Komandanti i Forcës së Sigurisë së Kosovës (FSK), gjenerallejtënant Bashkim Jashari, është duke qëndruar për vizitë zyrtare në Shtetet e Bashkuara të Amerikës.
Sipas njoftimi nga Forca e Sigurisë së Kosovës, Jashari gjatë qëndrimit në SHBA mori pjesë në organizimin e Konsullatës së Republikës së Kosovës në Iowa, ku vlerësoi lart bashkëpunimin dhe partneritetin dhe falënderoi zyrtarët shtetërorë për mbështetjen e pakursyer që ofrojnë për Forcën e Sigurisë së Kosovës, njofton Dukagjini.
“Gjithashtu, në kuadër të agjendës zyrtare KOMFSK vizitoi edhe shtëpinë e veteranëve të ushtrisë së SHBA-ve për këtë shtet. Gjatë kësaj vizite, Jashari u njoftua nga stafi i këtij institucioni me aktivitetet, procedurat dhe rolin e rëndësishëm në mbështetje të veteranëve. Në fund të vizitës, Jashari shprehu mirënjohje për të gjithë veteranët e ushtrisë së SHBA-së, të cilët kanë kontribuar në ruajtjen e paqes dhe sigurisë nëpër botë, në veçanti atyre që kanë shërbyer në Kosovë”, thuhet në njoftim.