Komisioni për Buxhet ka aprovuar kërkesën e Komunës së Prishtinës që buxheti i miratuar nga Kuvendi Komunal të përfshihet në buxhetin e vitit 2026.
Vendimi u mor me 10 vota “për”, pa asnjë kundër apo abstenim.
Në mbledhjen e Komisionit, ku po shqyrtohet projektligji i buxhetit të këtij viti para leximit të dytë në Kuvend, ministri i Financave, Hekuran Murati, tha se deri më tani buxhetin e kanë përmbyllur vetëm Komuna e Prishtinës dhe Shtimes.
Ai theksoi se rekomandimi i Ministrisë është që të përfshihen si amandamente tabelat buxhetore të dorëzuara nga këto dy komuna.
“Prandaj rekomandimi i Ministrisë së Financave është që të përfshihen si pjesë e tabelave të buxhetit të ligjit për ndarje buxhetore, meqenëse edhe ditën e djeshme pra e kam marrë buxhetin nga komuna e Prishtinës, pra për dallim nga asaj çfarë thuhej në vazhdimësi nga kryetari i komunës që e ka dërguar buxhetin, në fakt procedurat tek ditën e djeshme janë përmbyllur dhe janë dorëzuar të gjitha tabelat ashtu siç edhe kërkohet. Pra tash e kemi edhe komunën e Prishtinës edhe komunën e Shtimes të cilat i kanë përmbushur të gjitha kërkesat sa i përket përfshirjes në pjesën tabelare të buxhetit”, ka deklaruar ai.
Murati gjithashtu njoftoi se Komuna e Zubin-Potokut nuk e ka dorëzuar buxhetin sipas kërkesave, prandaj nuk mund të përfshihet në buxhetin e vitit 2026.
“Por sa i përket Prishtinës, komunës së Prishtinës dhe komunës së Shtimes, këto komuna tashmë kanë përmbushur të gjitha detyrimet dhe janë të gatshme që të përfshihen. Prandaj rekomandimi i Ministrisë së Financave do të ishte që komisioni pra të propozojë si amandament tek pjesa tabelare pra përditësimin e tabelave të këtyre dy komunave ashtu siç janë miratuar në kuvendet komunale dhe janë dorëzuar tek Ministria e Financave”, tha tutje ai.