Avokati Tomë Gashi ka komentuar konferencat e mbajtura nga presidentja e Kosovës dhe nga Lëvizja Vetëvendosje lidhur me kërkesën e Listës Serbe në Gjykatën Kushtetuese.
Në emisionin FIVE, Gashi tha se nuk është e pazakonshme që liderët politikë të deklarohen publikisht pas dorëzimit të komenteve në Kushtetuese.
Sipas tij, kjo nuk përbën shkelje kushtetuese.
“Nuk është jo normale, nuk është jo kushtetuese. Në demokraci është e lejueshme që kushdo në situata të tilla, para se të vendos Kushtetuesja, të deklarojë pasi të ketë dërguar komentet”, ka theksuar Gashi.
Megjithatë, ai shtoi se konferencat e tilla mund të interpretohen si presion ndaj Gjykatës Kushtetuese: “Një shtytje më e madhe, sigurisht që mund të jetë [presion] edhe për gjykatën”.
Sipas avokatit, këto dalje publike më shumë lidhen me përgatitjen e skenës politike për të ardhmen: “Unë besoj që gjithçka po përgatitet terreni për zgjedhjet e ardhshme, dhe ndoshta kjo mund të konsiderohet edhe fushatë parazgjedhore”.