Ish-kryetari i Oda Ekonomike e Kosovës, Safet Gërxhaliu, në një intervistë në emisionin FIVE në RTV Dukagjini, ka deklaruar se Kosova është shndërruar në një shtet të varur nga importi, duke theksuar se një zhvillim i tillë ishte paralajmëruar që më herët.
“Ajo që është më shqetësuese është fakti që, kur i adreson problemet nga viti në vit, ato jo që nuk zgjidhen, por shumohen si sfida”, ka thënë Gërxhaliu.
Ai ka theksuar se Kosova po dëmtohet rëndë nga agjenda politike. Sipas tij, vendi është shndërruar në një shtet të varur nga importi dhe në një shtet që eksporton para të gatshme. “Ajo që është më shqetësuese është fakti se, për shkak të disa ndodhive ekonomike që kanë ndodhur në vitin 2025, veçanërisht me energjinë elektrike, janë shfaqur disa fenomene që e karakterizojnë Kosovën”.
”E para është mungesa e institucioneve; e dyta, pas një situate të tillë, sidomos pas ngritjes së çmimeve të energjisë elektrike, nga Kosova në masë të madhe po del kapitali i bizneseve drejt vendeve të ndryshme…”, ka deklaruar ndër të tjera Gërxhaliu.