Është rikthyer furnizimi me energji elektrike nga mënstacioni Prishtina 3.
Lajmin e ka bërë të ditur operatori i sistemit, transmisionit dhe tregut të energjisë elektrike të Kosovës – KOSTT.
Për shkak të një avarie të madhe të ndodhur dje, ekipet e KOSTT-it kanë bërë një improvizim të përkohshëm që ka mundësuar energjizimin e nënstacionit.
“Mbi 50 punonjës janë angazhuar në përpjekjet për rikthimin e furnizimit me energji elektrike nga Nënstacioni Prishtina 3 dhe kontributi i tyre ka qenë jetik për arritjen e suksesit në stabilizimin e situates”, thuhet në njoftim.
Tutje bëhet e ditur se pas rikthimit të furnizimit, KOSTT do të punojë ngushtë me të gjitha institucionet relevante dhe akterët e nevojshëm për të vlerësuar dëmet e shkaktuara dhe për të identifikuar shkaqet që kanë shkaktuar avarinë.
“KOSTT mbetet plotësisht i përkushtuar në shërbim të qytetarëve, duke vazhduar të punojë pa rreshtur për të siguruar furnizim të qëndrueshëm me energji elektrike për të gjithë.
KOSTT kërkon mirëkuptim nga qytetarët, institucionet dhe bizneset e afektuara nga mungesa e energjisë elektrike”, thuhet në njoftim.