Komisioni Qendror i Zgjedhjeve (KQZ) ka mbajtur konferencën e tretë për procesin e votimit në përfaqësitë diplomatike të Republikës së Kosovës, duke dhënë detaje për ecurinë dhe pjesëmarrjen e qytetarëve në votimin jashtë vendit.
Kryesuesi i KQZ-së, Kreshnik Radoniqi, njoftoi se deri në orën 20:00, votimi është përmbyllur në 25 përfaqësi diplomatike në shtete si Turqia, Gjermania, Zvicra, Franca, Belgjika, Norvegjia, Austria, Suedia, Sllovenia, Danimarka, Italia, Kroacia, Holanda, Republika Çeke, Hungaria dhe Mbretëria e Bashkuar. Ndërkaq, sipas kohës lokale në Kosovë, votimi në katër përfaqësi diplomatike në Shtetet e Bashkuara të Amerikës dhe Kanada do të përfundojë në orën 01:00 të ditës së diel.
Radoniqi bëri të ditur se gjatë gjithë ditës së votimit jashtë vendit, KQZ ka qenë në kontakt të vazhdueshëm me përfaqësitë diplomatike dhe se procesi i votimit është zhvilluar pa ndonjë pengesë.
Ai, në emër të KQZ-së, falënderoi shefat dhe stafin e misioneve diplomatike, si dhe anëtarët e këshillave të vendvotimeve, për angazhimin dhe profesionalizmin e treguar gjatë këtij procesi.
“Sipas të dhënave nga 25 përfaqësi diplomatike ku është mbyllur votimi, si dhe nga të dhënat e orës 13:00 për votimin në ShBA dhe Kanada, nga gjithsej 19,187 votues të regjistruar, kanë votuar 81.29 për qind apo 15,597 votues”, ka bërë të ditur Radoniqi.
Sipas procedurave ligjore, fletëvotimet e hedhura në përfaqësitë diplomatike nuk do të numërohen jashtë vendit, por do të transportohen në Kosovë gjatë ditëve në vijim, ku edhe do të bëhet numërimi i tyre.