Kryetari i Partisë Demokratike të Kosovës (PDK), Memli Krasniqi ka zhvilluar një bisedë telefonike me të dërguarin special të Gjermanisë për Ballkanin Perëndimor, Manuel Sarrazin, me të cilin, ka diskutuar për propozimin evropian për normalizimin e marrëdhënieve ndërmjet Kosovës dhe Serbisë.
Gjatë bisedës me Sarrazin, Memli ka ripërsëritur qëndrimin e PDK-së dhe rezervat që kanë në raport me propozimin evropian, i cili, sipas tij, është i pamjaftueshëm për shtetin e Kosovës.
“Sikur edhe në takimet e tjera të këtyre ditëve, edhe emisarit Sarrazin i ripërsërita qëndrimin e PDK-së dhe rezervat që ne kemi në raport me këtë propozim, që është i pamjaftueshëm për Kosovën”, ka shkruar Krasniqi në rrjetin social Facebook.
Po ashtu, kreu u PDK-së, nëpërmjet postimit në Facebook, ka thënë se i ka deklaruar tashmë pesë pikat, të cilat duhet të jenë shtylla të një marrëveshjeje finale, gjithëpërfshirëse, ligjërisht dhe ndërkombëtarisht të obligueshme me Serbinë.
“Që të gjitha kanë qenë në linjë me interesin shtetëror të Kosovës dhe me qëndrimet e partnerëve tanë ndërkombëtarë”, ka shkruar tutje.
Ndërkaq, sipas tij, si pasojë e kokëfortësisë së kryeministrit të Kosovës, Albin Kurti dhe moskoordinimit me aleatët tanë, “ka dështuar në procesin e dialogut – duke mos përmbushur kërkesat dhe qëllimet tona shtetërore”.