Deputetja nga radhët e Lidhjes Demokratike të Kosovës, Rrezarta Krasniqi, në cilësinë e kryetares së Komisionit për Integrim Evropian të Kuvendit të Kosovës, ka marrë pjesë në takimet e COSAC-ut në Bruksel.
Heqja e masave ndaj Kosovës, të vendosura nga Bashkimi Evropian, ishte një nga kërkesat e deputetes.
“Si udhëheqëse e delegacionit të Kosovës, kam kërkuar mbështetje për proceset që Kosova po kalon, veçanërisht për: Heqjen e masave të vendosura nga BE-ja, Kosova duhet të marrë statusin e vendit kandidat për anëtarësim në BE. Anëtarësim të Kosovës në Këshillin e Evropës, duke e paraqitur atë si një hap të rëndësishëm për përparimin e Kosovës në rrugën drejt integrimit evropian”, shkroi ajo në Facebook.
Ajo ka theksuar se avancimi i Kosovës në agjendën evropiane do të thotë më pak mundësi për ndërhyrjen ruse në Ballkanin Perëndimor.
“Sot shteti i Kosovës është i vetmi vend në Ballkanin Perëndimor që ende nuk i është dhënë statusi i vendit kandidat për anëtarësim në BE. Prandaj kërkoj mbështetjen tuaj si shtete anëtare, sepse avancimi i Kosovës në agjendën evropiane do të thotë më pak mundësi për ndërhyrjen ruse në Ballkanin Perëndimor…”, tha ajo.