Kryetari i PDK-së, Memli Krasniqi, në “Debat Plus”, ka thënë se partia që ai e drejton, kur ka ardhur në pushtet në vitin 2007, e kishte gjetur në gjendje të rëndë Kosovën.
Krasniqi i ka përmendur disa nga ato që ai i quajti suksese të PDK-së, e që sipas tij, e kanë transformuar Kosovën për të mirë.
“PDK e ka transformuar Kosovën, e ka marrë një Kosovë që ka qenë pa asnjë perspektivë zhvillimore në vitin 2007, me një buxhet prej 700 milionë eurosh. E kemi drejtuar procesin e pavarësisë që ka qenë meritë e qytetarëve të Kosovës”, ka thënë Krasniqi.
“I kemi themeluar krejt institucionet që i duhen e si ka pasur një vend i pavarur, kemi krijuar krejt mundësitë që i janë dashur prej sipërmarrësve e deri te sektorët publikë. I kemi rritur pagat për njerëzit që pagat i kanë pasur paga sociale, i kem nxjerrë nga kontejnerët nxënësit e Kosovës, e i kemi dërguar në shkolla në moderne”, ka vijuar Krasniqi.
Tutje, Krasniqi ka folur edhe për liberalizimin e vizave, ku tha se Kosova i ka plotësuar kushtet vite më parë.