Kryetari i Partisë Demokratike të Kosovës (PDK), Memli Krasniqi të hënën ka pritur në takim një delegacion të Grupit të Miqësisë Austri-Kosovë të udhëhequr nga deputetja, Carmen Jeitler-Cincelli.
Në takimin me deputetët austriakë, Krasniqi ka bërë të ditur se kanë diskutuar për raportet e shkëlqyeshme në mes të Kosovës dhe Austrisë dhe mundësitë e thellimit të bashkëpunimit bilateral.
Tutje, ai ka theksuar se populli i Kosovës është mirënjohës për ndihmën dhe mbështetjen e dhënë nga Austria ndër vite, në fusha të ndryshme.
“PDK mbetet e përkushtuar në kultivimin e raporteve të mira me miqtë dhe aleatët tanë ndërkombëtarë, në funksion të arritjes së qëllimeve tona shtetërore”, ka thënë Krasniqi.
Po ashtu edhe presidentja e vendit, Vjosa Osmani ka takuar sot delegacionin e Grupit të Miqësisë Austri-Kosovë në Parlamentin e Austrisë, të përbërë nga deputetë të partive të ndryshme politike në Austri.
Në takim me delegacion austriak, Presidentja Osmani ka falënderuar shtetin e Austrisë për mbështetjen ndaj Kosovës përgjatë viteve, ndërsa ka shprehur gatishmërinë që të hapen kapituj të rinj të bashkëpunimit në mes të dy vendeve.