Kryetari i Partisë Demokratike të Kosovës, Memli Krasniqi, ka takuar komunitetin shqiptar në Kantonin e Gjenevës.
Krasniqi, nëpërmjet një postimi në Facebook, është shprehur se festa e 15-vjetorit të Pavarësisë së Kosovës nuk mund të përmbyllej pa e ndarë gëzimin me mërgatën, e cila i ka dhënë shumë Kosovës për arritjen e lirisë, pavarësisë dhe shtetndërtimit.
“Falënderim për Prof. Djawed Sangdel, drejtor menagjues i Swiss UMEF University, në hapësirat e të cilit patëm një takim mbresëlënës me komunitetin shqiptar në Kantonin e Gjenevës. Mërgata jonë këtu, përveçqë kanë dhënë gjithçka për Kosovën, po ashtu ka sjellë edhe Kosovën në Zvicër. Xhaka, Shaqiri, Behrami e shumë sportistë e artistë të tjerë, sot i bëjnë nder secilit qytetar të Kosovës, secilit shqiptar kudo që është, me kontributin e tyre në zhvillimin e sportit, artit e kulturës dhe fushave të tjera këtu në Zvicër”, ka shkruar Krasniqi.
Po ashtu, kreu i PDK-së ka thënë se duke krijuar mundësi për rikthimin e trurit dhe investitorëve nga mërgata në Kosovë, mund të ndërtohet një ardhme më prosperuese për shtetin dhe qytetarët e Kosovës.
Ndërkaq, ai ka shtuar se është për t’u përshëndetur fakti që mërgata ka arritur të integrohet më mirë se kushdo tjetër nga jashtë, pa e shkëputur as edhe më të voglin element që i lidh me Kosovën dhe me kombin tonë, nga kjo, sipas tij, dilema rreth të ardhmes tonë nuk ka.