Kryeministri i Spanjës, Pedro Sánchez, ka ashpërsuar kritikat ndaj veprimeve të Izraelit në Gaza, duke akuzuar qeverinë e Benjamin Netanyahut se po “shfaros një popull të pambrojtur” përmes bombardimit të spitaleve dhe “vrasjes së fëmijëve të pafajshëm përmes urisë”.
Duke folur të hënën në mëngjes për të njoftuar një sërë masash që synojnë rritjen e presionit mbi Netanyahun për të ndalur ofensivën ushtarake, Sánchez tha se, ndonëse qeveria spanjolle do të mbështesë gjithmonë të drejtën e Izraelit për të ekzistuar dhe për t’u mbrojtur, ajo ndihej e detyruar të përpiqej për të “ndalur një masakër”.
“Ta mbrosh vendin dhe shoqërinë tënde është një gjë, por të bombardosh spitale dhe të vrasësh fëmijë të pafajshëm me uri është diçka krejt tjetër,” tha ai.
“Ajo që kryeministri Netanyahu e paraqiti në tetor të vitit 2023 si një operacion ushtarak në përgjigje të sulmeve terroriste të tmerrshme, është shndërruar në një valë të re pushtimesh të paligjshme dhe një sulm të pajustifikueshëm ndaj popullsisë civile palestineze – një sulm që raportuesi special i OKB-së dhe shumica e ekspertëve tashmë e përshkruajnë si gjenocid.”
Kryeministri spanjoll përmendi numrin e të vrarëve, të plagosurve, të zhvendosurve dhe të kequshqyerve. “
Kjo nuk është vetëmbrojtje; nuk është as sulm. Është shfarosje e një populli të pambrojtur. Është shkelje e çdo norme të së drejtës humanitare.”
Sánchez kritikoi gjithashtu edhe komunitetin ndërkombëtar, duke thënë se fuqitë e mëdha botërore janë paralizuar “mes indiferencës ndaj një konflikti të pafund dhe bashkëpunimit me qeverinë e kryeministrit Netanyahu”.
Ndër masat që ai njoftoi “për të ndalur gjenocidin në Gaza dhe për të ndjekur penalisht autorët e tij” ishin: një ligj që formalizon ndalimin tashmë në fuqi për shitjen apo blerjen e pajisjeve ushtarake me Izraelin; ndalim të përdorimit të porteve dhe hapësirës ajrore spanjolle për transport të karburantit apo armëve drejt ushtrisë izraelite; si dhe ndalimi i hyrjes në Spanjë për personat “të përfshirë drejtpërdrejt në gjenocid”. Sánchez njoftoi gjithashtu rritje të ndihmës humanitare për Gazën.
“E dimë që këto masa nuk do të jenë të mjaftueshme për të ndalur pushtimin apo krimet e luftës,” tha ai.
“Por shpresojmë që do të shtojnë presionin ndaj kryeministrit Netanyahu dhe qeverisë së tij, do të lehtësojnë sadopak vuajtjet e popullit palestinez, dhe do t’i tregojnë popullit spanjoll se vendi i tyre ishte në anën e duhur të historisë në njërën nga ngjarjet më të turpshme të shekullit XXI.”
Komentet dhe masat e Sánchez-it u pritën me një reagim të ashpër nga qeveria izraelite, e cila e akuzoi administratën e tij për “retorikë të egër dhe plot urrejtje” dhe për një “sulm të vazhdueshëm anti-izraelit dhe antisemit” për të devijuar vëmendjen nga akuzat për korrupsion.
Ministri i Jashtëm izraelit, Gideon Sa’ar, njoftoi se dy politikanë të lartë të majtë spanjollë – ministrja e Punës dhe zëvendëskryeministrja Yolanda Díaz dhe ministrja e Rinisë Sira Rego – do të ndalohen të hyjnë në Izrael për shkak të kritikave të tyre ndaj sjelljes së Izraelit në Gaza.
Sa’ar tha se ishte e qartë që Díaz – themeluese e aleancës Sumar, partnere në koalicionin qeverisës të udhëhequr nga socialistët – po “shfrytëzon dobësinë politike të kryeministrit Sánchez dhe po e tërheq hap pas hapi drejt zbatimit të vizionit të saj anti-izraelit dhe antisemit”.
Ministria e Jashtme e Spanjës i cilësoi deklaratat e qeverisë izraelite si “të rreme dhe shpifëse”, ndalimin e hyrjes për Díaz dhe Rego si “të papranueshëm”, dhe theksoi se vendi nuk do të “frikësohet në mbrojtje të paqes, ligjit ndërkombëtar dhe të drejtave të njeriut”.
Ajo gjithashtu përkujtoi se Spanja i ka dhënë shtetësi 72,000 pasardhësve të hebrenjve të dëbuar në vitin 1492, si dhe ka dënuar menjëherë “sulmet e tmerrshme” të Hamasit në tetor të 2023-it dhe ka bërë thirrje për lirimin e pengjeve.
Deklaratat e Sánchez-it erdhën afro një javë pasi ai i tha The Guardian se reagimi ndaj ofensivës izraelite ndaj territoreve palestineze ka qenë “një dështim”.
Ndërkohë, të dielën, Gjykata e Lartë e Izraelit vendosi se qeveria kishte dështuar të siguronte ushqim të mjaftueshëm për të burgosurit palestinezë të sigurisë dhe urdhëroi autoritetet të përmirësojnë kushtet ushqimore. Vendimi përbën një rast të rrallë kur gjykata më e lartë e vendit vendos kundër veprimeve të qeverisë gjatë luftës gati dyvjeçare.
Trupi prej tre gjyqtarësh vendosi njëzëri se shteti është ligjërisht i detyruar të sigurojë ushqim të mjaftueshëm për një “nivel minimal të ekzistencës”. Në vendim, gjyqtarët thanë se kishin gjetur “tregues që furnizimi aktual me ushqim nuk garanton plotësisht përmbushjen e standardeve ligjore”.
Ata thanë se kishin “dyshime reale” që të burgosurit po ushqeheshin siç duhet, dhe urdhëruan shërbimin e burgjeve të “marrë masa për të siguruar furnizim ushqimor që mundëson kushte minimale ekzistence, në përputhje me ligjin”.