Kryetari i komunës së Ferizajt, Agim Aliu, ka bërë të ditur se lumi “Neredime” ka dalë nga shtrati, si shkak i reshjeve të dendura të shiut.
Me anë të një postimi në Facebook, Aliu ka publikuar disa foto të dëmeve nga vërshimet. Ai ka thënë se ndihma u është ofruar qytetarëve nga kapacitetet e komunës.
“Mbrëmë, reshjet aq të dendura të shiut, bënë që të dalë nga shtrati lumi “Neredime” e për pasojë të vërshohen disa zona të Ferizajt, disa nga fshatrat e Grykës së Neredimes dhe një pjesë e fshatrave Slivovë, Koshare e Dremjak, ku bashkë me drejtorin e Shërbimeve Publike dhe Emergjencë, Arben Halili dhe ekipet emergjente dolëm në vizitë, për të ofruar gjithë kapacitetin tonë organizativ emergjent në mbrojtje të jetës e pasurisë së qytetarëve”, ka deklaruar ai.
Reshjet e shiut kanë qenë të shpeshta në Kosovë. Nga vërshimet, komuna më e prekur ka qenë ajo e Pejës.
Nga vërshimet e fundit, humbën jetën dy qytetarë.