Kryetari i Komunës së Vushtrrisë e njëheri, kandidat i PDK – së për një tjetër mandat, Ferit Idrizi ka përuruar parkingun nëntokësor të qytetit.
Mes vushtrriasve, Idrizi preu shiritin gjersa bashkë me ta, vizituan ambientet e brendshme.
Këtë projekt, ai e cilësoi si “kryeveprën” e qytetit.
“Është një moment i veçantë. Faleminderit qytetarëve që janë prezent këtu, ju kanë gëzu këtij projekti. Është njëri prej projekteve më domethënëse që unë prej fillimit e kam quajtur si kryevepra e qytetit të Vushtrrisë dhe transformimi i qytetit të Vushtrrisë ku do të bashkohen modelja dhe klasikja. Sot e përuruam parkingun nëntokësor, një parking modern që i plotëson të gjitha standartet bashkë me sheshin e qytetit dhe po ashtu sot ngritëm edhe flamurin e UÇK që qëndron pranë shtatores. Urime qytetarëve të Vushtrrisë, e gëzofshim, e trashëgofshim me të mira.”, ka thënë Idrizi.
Mes të tjerash, Idrizi bëri të ditur edhe shumën e projektit.
“Ky investim komplet i komunës 2 milionë e 700 mijë euro por loti II do vazhdoj te sheshi e deri te galeria.”, ka deklaruar ai.
Idrizi së bashku me zyrtarët e tjerë komunal bën homazhe tek shtatorja e heroit, Adem Jashari për të ngritur më pas, flamurin e UÇK-së, përballë hyrjes së parkingut nëntokësor.