Ish-gjyqtari i Gjykatës Kushtetuese, Kadri Kryeziu, ka deklaruar se në situatën aktuale të bllokadës në Kuvendin e Kosovës, vetëm Presidentja e Republikës ka legjitimitet të plotë për t’iu drejtuar Gjykatës Kushtetuese.
“Neni 113, pika 3 dhe 5 e Kushtetutës, e autorizon Presidenten që, si palë me legjitimitet të plotë, të kërkojë interpretim nga Gjykata Kushtetuese nëse konsideron se ka pasur shkelje gjatë procesit të konstituimit të Kuvendit,” tha Kryeziu në emisionin Five në RTV Dukagjini.
Ai theksoi se nga të gjitha palët e autorizuara — Presidentja, Parlamenti, Qeveria dhe deputetët — vetëm Presidentja gëzon legjitimitet të plotë aktualisht, pasi as Parlamenti dhe as Qeveria nuk janë funksionale.
“Për momentin, Presidentja është i vetmi faktor kushtetues me legjitimitet të plotë. Të gjitha institucionet e tjera janë jofunksionale ose pa bazë të plotë legjitime për të ndërmarrë veprime para Gjykatës Kushtetuese,” përfundoi Kryeziu.