Zëdhënësi i Qeverisë së Kosovës, Përparim Kryeziu, ka mohuar akuzat e raportueses për Kosovën në Parlamentin Evropian, Viola von Cramon, e cila reagoi kundër fushatës në internet ndaj këshilltarit të saj, Gjorgje Bojoviq, duke i thënë që të mos mbështesë teoritë konspirative kundër një qeverie demokratike.
Kryeziu ka thënë se qeveria nuk është përfshirë e as nuk do të përfshihej kurrë në abuzim me pushtetin, duke sponsorizuar “fushatë të tillë online”.
“Ne i mohojmë akuzat nga Viola von Cramon, me të cilën, komunikojmë rregullisht përmes kanaleve zyrtare. Ne i bëjmë thirrje asaj dhe të tjerëve që të mos mbështesin teoritë e konspiracionit kundër një qeverie demokratike”, ka shkruar Kryeziu në “X”.
Our Govt has never & would never engage in abuse of power by sponsoring online trolls. We deny the allegations by @ViolavonCramon, with whom we regularly communicate via official channels. We urge her and others not to endorse conspiracy theories against a democratic government. https://t.co/NfzVYHMxJW
— Perparim Kryeziu (@KryeziuPerparim) March 13, 2024
Ndryshe, Gjorgje Bojoviq, ditë më parë u ankua se ndaj tij ka nisur një fushatë nga robotët e internetit kryesisht nga Kosova, për deklaratën që pati bërë më 2015 për krimet e luftës të kryera në Kosovë.
Von Cramon doli në mbështetje të tij, duke thënë se “Lajmet e rreme, fushatat dezinformuese, propaganda qeveritare… nuk do ta ndryshojnë pozicionin e dikujt, por thjesht do t’i dobësojnë shanset e Kosovës për të përparuar shpejt. Kjo është e trishtë për vendin”.