KFOR-i, misioni i NATO-s në Kosovë, ka shprehur mirënjohje dhe ka përshëndetur festimet paqësore të festës së Kurban Bajramit dhe festën e “Vidovdanit” që ishin në të njëjtën ditë.
Në një komunikatë të lëshuar nga KFOR-i, ata kanë theksuar rëndësinë e dialogut dhe promovimit të paqes dhe kanë pohuar se fetë luajnë një rol kyç në bashkëjetesën e komuniteteve.
“KFOR-i gjithmonë mirëpret dhe mbështet mesazhet që promovojnë paqen dhe dialogun. Fetë luajnë një rol kyç në bashkëjetesën ndërmjet komuniteteve. Ceremonitë paqësore të Vidovdanit dhe Kurban Bajramit sot tregojnë rëndësinë e vazhdimit të dialogut përmes tolerancës dhe respektit të ndërsjellë”, thuhet në njoftimin e KFOR-it.
Këtë të mërkurë, dhjetëra qytetarë serbë ishin mbledhur në oborrin e Manastirit të Graçanicës për të festuar Ditën e Vidovdanit, e cila festohet për çdo vit, për çdo 28 qershor.
Lexo edhe: Vllasi: Festimet e Vidovdanit në Kosovë, propagandë e Serbisë
Ekipi i RTV Dukagjini kishte qëndruar gjatë ditës në Graçanicë dhe ka raportuar se numri i pjesëtarëve të Policisë së Kosovës dhe të KFOR-it ishte shtuar.
Zakonisht, Vidovdani festohet në Gazimestan, dhjetë kilometra larg kryeqytetit, Prishtinës, por këtë vit do të mbahet në Graçanicë. Kjo, me vendim të peshkopit, Teodosije Shibaliq.