Në mbledhjen e Këshillit të Përgjithshme të Lëvizjes Vetëvendosje, kryeministri Kurti ka deklaruar se asnjëherë nuk do të tolerohet prekja e pavarësisë dhe integritetit territorial të Kosovës.
Kurti është shprehur që kur kërkojnë të respektohet pavarësia dhe integriteti territorial i Ukrainës, “as që bëhet fjalë të mendohet se do të tolerojmë prekjen e pavarësisë, sovranitetit apo integritetit territorial të Kosovës”.
Kryeministri Kurti ka shtuar se Kosova në aspektin ndërkombëtar po e bën detyrën e vet, “duke u rreshtuar menjëherë e pa asnjë kusht në radhën e vendeve që dënuan Rusinë e që mbështesin pavarësinë dhe integritetin territorial të Ukrainës”.
Në këtë mbledhje, Kurti ka thënë se siç vepronte në të kaluarën Serbia, është duke vepruar gjatë kësaj periudhe edhe Rusia.
“Menduam se me përfundimin e luftërave që i shkaktoi Serbia në Ballkan, erdhi një paqe e qëndrueshme në Evropë, por ja që siç veproi Serbia dje, po vepron Rusia sot. Këto dy shtete kanë një lidhje historike e kulturore me njëra-tjetrën, në linjat e autokracisë e despotizmit, agresionit dhe gjenocidit”, ka theksuar Kurti.
Gjatë mbledhjes, Kurti ka përmendur disa arritje të Lëvizjes Vetëvendosje gjatë katër viteve të fundit.
Ai ka theksuar protestën e shtatorit të vitit 2018, sipas tij, më e madhja pas luftës në Kosovë, me slloganin “Një popull si nënshtrohet një njeriu”. Ndërsa për vitin 2019, Kurti ka përmendur fushatën masive, gjithë Kosovën kundër “PAN hajnisë”. Po ashtu, ka theksuar se në tetor të viti 2019 dolën të parët në zgjedhje dhe në shkurt të vitit 2020, e krijuan qeverinë e parë të udhëhequr nga kjo parti.