Kryeministri i vendit, Albin Kurti, ka thënë se nuk është në dijeni nëse anëtarësimi i Kosovës në Këshillin e Evropës do të futet në agjendën e mbledhjes së Komitetit të Ministrave.
Në një konferencë për media pas mbledhjes së Qeverisë, Kurti thotë së nuk varet më nga Kosova, sepse ajo ka plotësuar të gjitha kushtet.
“Më besoni po të varej prej meje, do të vendosej në agjendë dhe ‘për’ Kosovën”, tha Kryeministri.
“Me 82 për qind, Asambleja Parlamentare ka votuar në favor të Kosovës, por nuk mund ta marrë atë rol që të flas në emër të shteteve aty. Është mirë që atyre t’u bëhen pyetjet për këtë gjë, çka s’paska plotësuar Kosova? Pse raporti i juristëve eminentë konstaton në mënyrën më të qartë të mundshme vlerësimin më të lartë për Kosovën?”, shtoi Kurti.
Kreu i ekzekutivit potencoi se aspiratat e Kosovës për anëtarësim në Këshillin e Evropës duhet të përballen me një përgjigje pozitive.
“Korniza ligjore e Kosovës është gjerësisht në përputhje me standardet e KiE-së dhe se Kushtetuta e saj është një instrument shumë progresiv. Kosova ka përjetuar shumë padrejtësi në të kaluarën dhe në aktuale, mirëpo nuk kemi përgjegjësi e as faj për këtë gjë”.