Kryeministri i Kosovës, Albin Kurti ka njoftuar se me ftesë të presidentit të Turqisë, Rexhep Taip Erdogan, bashkë me ministrin e Kulturës, Rinisë dhe Sportit, Hajrulla Çeku, ambasadorin e Kosovës në Turqi, Agon Vrenezi dhe ish-kryetarin e Prizrenit, Mytaher Haskuka, ishin në një vizitë pune në Stamboll, të premten e 3 shkurtit.
“Përgjatë takimit dhe darkës së punës biseduam për raportet tona miqësore dhe për mënyrat sesi mund t’i thellojmë e forcojmë ato”, ka shkruar Kurti.
Kryeministri Kurti ka thënë se kanë diskutuar për mundësitë e reja të bashkëpunimit në rrafshin ekonomik e tregtar dhe të sigurisë e mbrojtjes.
“I jemi përherë mirënjohës Turqisë për mbështetjen e pakursyer në çdo etapë të ndërtimit të shtetit tonë e shumë fusha të zhvillimit të tij”, ka shtuar kryeministri i vendit.
Tutje kryeministri Kurti e ka falënderuar presidentin Erdogan për mikpritjen dhe përkrahjen e “zëshme” të Turqisë për anëtarësimin e Kosovës në NATO dhe Këshillin e Evropës.