Kryeministri i Kosovës, Albin Kurti në prezantimin e buxhetit për vitin 2023 në Pejë ka komentuar edhe sistemin e drejtësisë, duke thënë se secilën ditë që po vazhdon si kryeministër mendon se më e rëndësishme do të ishte t’a kishte pozitën e kryeprokurorit.
“Por unë kryeprokuror nuk mund të bëhem, ndërsa kryeministër më keni bërë ju”, ka thënë Kurti.
Kurti ka shtuar se për të ecur mbarë nëse nuk funksionon prokuroria dhe gjyqësia siç duhet “do të vonohemi shumë”.
Tutje kryeministri Kurti ka theksuar se është gjithnjë e më pak optimist që dhe në këtë “do t’ia dalim bashkë sikurse tjerat”.
Kryeministri i Kosovës Albin Kurti, ministri i Financave, Punës dhe Transfereve, Hekuran Murati dhe ministri i Administrimit të Pushtetit Lokal, Elbert Krasniqi kanë prezantuar buxhetin për vitin e ardhshëm para qytetarëve të Pejës, të shtunën e tre dhjetorit.
“Buxheti që u dedikohet komunave për vitin 2023 parashihet të jetë rreth 100 milionë euro më shumë se sa sivjet, ndërkaq buxheti për Komunën e Pejës mbi 33 milionë euro”, njofton Zyra e Kryeministrisë.
Mes tjerash thuhet se Kurti ka potencuar se së bashku me ministrin Murati dhe ministrin Krasniqi kanë bashkëbiseduar me qytetarët duke dhënë detaje shtesë mbi ndarjet buxhetore dhe projektet për vitin tjetër.