Kryeministri i Kosovës, Albin Kurti, ka bërë të ditur se restaurimi i tre aseteve të Kishës Ortodokse Serbe në Kosovë ka përfunduar.
Nëpërmjet një postimi në Twitter, Kurti ka thënë se ky rezultat është arritur në partneritet me Bashkimin Evropian dhe Programin e Zhvillimit të Kombeve të Bashkuara (UNDP), duke shtuar se trajtimi i barabartë i të gjitha grupeve etnike dhe fetare në Kosovë është prioritet i qeverisë së tij.
Ai ka theksuar se ky sukses në restaurimin e aseteve kulturore dhe fetare tregon përkushtimin e Qeverisë së Kosovës për të ruajtur trashëgiminë kulturore të vendit dhe për të siguruar një trajtim të drejtë për të gjitha komunitetet fetare.
“Në partneritet me BE dhe UNDP, ne kemi arritur një rezultat të madh për trashëgiminë kulturore dhe fetare: Restaurimi i 3 aseteve të Kishës Ortodokse Serbe—të mbrojtura nga ligji i Kosovës—ka përfunduar tani. Trajtimi i barabartë i të gjitha grupeve etnike dhe fetare në Republikën e Kosovës është prioritet i Qeverisë sonë”, ka shkruar Kurti.
