Kryeministri i Kosovës, Albin Kurti, zhvilloi një bashkëbisedim me ish-kryeministrin grek, njëherësh edhe ish-ministër i Punëve të Jashtme, ish-ministër i Arsimit, George Papandreou.
Lidhur me këtë, kryeministri Kurti shkroi disa fjalë në Twitter.
Ai ka thënë se gjatë këtij diskutimi ka folur për të ardhmen e Bashkimit Evropian, të ardhmen e Kosovës dhe marrëdhëniet me vendet e tjera të Ballkanit, në veçanti Marrëveshjen Bazë me Serbinë.
“Kisha kënaqësinë e madhe të hapja së bashku panelin për Ballkanin në Simpoziumin e 25-të vjetor Symi. Falënderova ish-kryeministrin grek dhe MPJ-në për ftesën dhe diskutova për të ardhmen e BE-së, të Kosovës, marrëdhëniet tona me vendet e tjera të Ballkanit dhe Marrëveshjen Bazë me Serbinë”, shkroi ai.
Had the great pleasure of opening the panel on the Balkans together with @GPapandreou at the 25th annual Symi Symposium. I thanked the former Greek PM and MFA for the invitation & discussed 🇽🇰’s EU future, our relations with other Balkan countries and the Basic Agmt w/ Serbia. pic.twitter.com/cgE4ECg2Sp
— Albin Kurti (@albinkurti) July 17, 2023
Ky bashkëbisedim i parapriu dy paneleve diskutuese për Ballkanin në njërin prej të cilit mori pjesë emisari e ndërmjetësi evropian për Ballkanin Perëndimor, Miroslav Lajçak.
Në njoftimin e zyrës së kryeministrit nuk tregohet nëse ka pasur bashkëbisedim në mes të Kurtit dhe Lajçakut.
“Kryeministri Kurti e falënderoi për organizimin e këtij simpoziumi në të cilin marrin pjesë politikanë e diplomatë progresistë, akademikë e ekspertë të shquar. Në pyetjet e ish kryeministrit grek ai njoftoi audiencën me punën e institucioneve në Kosovë, me theks për përparimin demokratik, ekonomik, sundimin e ligjit dhe luftën kundër korrupsionit, të drejtat e njeriut dhe të pakicave, politikat sociale dhe pluralizmin politik”, thuhet në njoftim.