Kryeministri i Kosovës, Albin Kurti, ka thënë se në takimin e 21 tetorit me pesëshen perëndimore është thënë që drafti për vetëmenaxhim është shkruar me kujdes ndaj strukturës së Kushtetutës dhe ligjeve të Kosovës dhe nëse do të nënshkruhej dje në takimin në Bruksel atëherë do të kontrollohej nga Gjykata Kushtetuese.
“Më 21 tetor, nga emisarët na është thënë se drafti për vetëmenaxhim është shkruar me kujdes ndaj shkronjës dhe strukturës së Kushtetutës dhe ligjeve të Republikës së Kosovës dhe që nëse do të nënshkruhej aty parashihej që ta kontrollonte Gjykata Kushtetuese menjëherë” ka thënë Kurti.
Kurti ka theksuar sërish se ishte Serbia ajo që refuzoi ta nënshkruante marrëveshjen përfshirë këtu edhe atë për vetëmenaxhim.
“Nënshkrimi do të nënkuptonte pranim e për rrjedhojë edhe zbatim mirëpo pranimi do të thotë nënshkrim e vetëm nënshkrimi do të thotë pranim dhe garanci për zbatim. Serbia refuzoi sërish nënshkrimin edhe draftin për vetëmenaxhim”, ka theksuar Kurti.
Kurti: Vuçiq bëri sulm të drejtpërdrejtë ndaj marrëveshjeve që janë bërë në Bruksel e Ohër
Tutje, Kurti ka thënë se presidenti i Serbisë, Aleksandër Vuçiq ka bërë sulm të drejtpërdrejtë ndaj marrëveshjeve që janë bërë në Bruksel e Ohër.
Ai ka thënë se në të kaluarën Serbia lavdërohej me nënshkrimet që i bënte me “pararendësit e tij” ndërsa tashmë “nuk duan pikërisht për shkak të përmbajtjes dhe kuptimit që kanë këto tekste të marrëveshjes”.
“Presidenti i Serbisë nuk po nënshkruan sepse i ka thënë po marrëveshjes bazike tashmë duket se i ka rënë pishman që ka thënë po. Ka filluar gjithnjë më shpesh të përsërisë se e pranon marrëveshjen në koncept e jo në përmbajtje ndërsa zbatimin në mënyrë të kufizuar. Ky është sulm i drejtpërdrejtë ndaj marrëveshjeve që i kemi bërë në Bruksel e Ohër. Ju e dini që në të kaluarën lavdëroheshin me nënshkrimet që bënin me pararendësit e mi, ndërkaq tash nuk duan pikërisht për shkak të përmbajtjes dhe kuptimit që kanë këto tekste të marrëveshjes, sikur të mos mjaftonte kjo ata gjithmonë insistojnë të dërgojnë letra anësore, shkresa shtesë të cilët praktikisht e sulmojnë edhe zyrtarisht edhe formalisht marrëveshjen bazë dhe aneksin zbatues”, ka theksuar Kurti.