Kryeministri i Kosovës, Albin Kurti, të dielën e 24 korrikut ka vizituar ambientet e Aeroportit Ndërkombëtar të Prishtinës “Adem Jashari”, ku takoi bashkatdhetarë të shumtë dhe deklaroi se Kosova u ka borxh.
Kjo për shkak se siç theksoi Kurti bashkatdhetarët kanë ndihmuar “në mënyrë të jashtëzakonshme edhe në çlirimin e Kosovës por edhe në zhvillimin e demokratizimit”.
“Sot e vizitova aeroportin e Prishtinës dhe bashkëbisedova me bashkatdhetarët tanë, të cilit porsa kishin ateruar dhe po prisnin ta merrnin bagazhin dhe të shkonin në vendlindjen e tyre. Bashkëbiseduam për shërbimet në aeroport, por gjithashtu edhe për shpresat e tyre për të ardhmen”, ka thënë Kurti.
“Gjithashtu edhe në e-Kosova ne ofrojmë nxjerrjen online të certifikatave të gjendjes civile, të ekstraktit të lindjes, të martesës që po ashtu është një lehtësim për bashkatdhetarët tanë, të cilëve ne u kemi shumë borxh, për shkak se ata me kërkesën e tyre, aftësinë e tyre, historikun e tyre e kanë ndihmuar në mënyrë të jashtëzakonshme edhe çlirimin e Kosovës, por edhe zhvillimin e demokratizimit të saj”, shtoi ai, shkruan KP.
Kreu i ekzekutivit ka përmendur edhe vendimin e Qeverisë, që synon t’i përfshijë bashkatdhetarët për gjashtë muaj në Ministrinë e Punëve të Jashtme dhe Diasporës, në kuadër të programit të diplomacisë qytetare.
Ndryshe, bashkatdhetarët po vazhdojnë të vijnë në Kosovë, jo vetëm përmes linjave ajrore.
Ata kanë marrë rrugën drejt Kosovës edhe me automjetet e tyre.
Raporti i Qendrës Kombëtare për Menaxhim Kufitar, ka njoftuar për kolonat dhe pritjet e gjata në vendkalimet kufitare të Kosovës me Serbinë.
Si në çdo vit tjetër, bashkatdhetarët të cilët jetojnë në vende të ndryshme të Evropës kanë marrë rrugën drejt Kosovës për t’i kaluar pushimet.
Ata po detyrohen të presin edhe kësaj here në pikat kufitare me Serbinë.
Pritjet më të gjata janë regjistruar në pikën kufitare te Dheu i Bardhë.
Kolona të gjata në pikat kufitare Dheu i Bardhë dhe Merdare, pritjet deri në 90 minuta