Kryeministri i Republikës së Kosovës, Albin Kurti, ka thënë se nuk ka pasur ndonjë fazë të shtetndërtimit të Kosovës, në të cilën, gratë nuk kanë qenë të përfshira.
Në edicionin e parë të Forumit Ndërkombëtar për Gratë, Paqen dhe Sigurinë, të mbajtur të shtunën, Kurti ka thënë se pjesëmarrja e grave në institucionet e sigurisë e siguron suksesin e vendit dhe se ajo, u besohet po aq sa burrave kur flitet për sigurinë.
“Nuk ka pasur ndonjë fazë kur gratë nuk kanë qenë të përfshira për liri dhe paqe, dhe angazhimi i grave nuk ka munguar në shtetndërtim. Ato kanë mbajtur armë të ndryshme në dorë me një qëllim të vetëm për paqe për të gjithë. Pjesëmarrja e grave në institucionet e sigurisë e siguron suksesin tonë. Gratë dhe vajzat e Kosovës kanë sakrifikuar shumë, kanë qenë viktima dhe luftëtare, kanë kontribuuar në kategori të ndryshme dhe kanë kontribuuar në demokratizimin. Gratë kanë udhëhequr jo vetëm politikat, por njerëzit i besojnë grave po aq sa burrave kur vjen puna të siguria”, ka deklaruar Kurti.
Sipas tij, vetëm të marrët pjesë nuk është e mjaftueshme dhe se krahas saj, nevojitet edhe kontributi aktiv, gjë e cila, sipas tij, ka munguar.
“Përkundë progresit pozitive që kemi bërë në shoqëri sfidat janë të mëdha. Si kryeministër, shprehi gatishmërinë për përkrahjen e grave në fuqizimin e tyre dhe shtimin e pjesëmarrjes së tyre. Nuk mjafton vetëm pjesëmarrja, por kontributi aktiv dhe pjesëmarrja do të thotë se ato kontribuojnë prej kësaj pjesëmarrjeje. Gratë duhet të njihen për kontributin e tyre se një gjë e tillë u ka munguar për një kohë të gjatë”, ka shtuar Kurti.
Ndërkaq, Presidentja e Republikës së Kosovës, Vjosa Osmani-Sadriu, e cila hapi forumin ka thënë se historia e Kosovës paraqet historinë e secilës grua, e cila largoi një gur nga rruga që drejton, drejt demokracisë. Ajo ka thënë se prezenca e grave në vendimmarrje është më se e domosdoshme.