Kryeministri i Kosovës, Albin Kurti, në seancën e së enjtes në Kuvendin e Kosovës, sa i përket gjashtë kushteve që i ka përmendur për themelimin e Asociacionit të komunave me Shumicë Serbe në Kosovë, ka kërkuar nga opozita që të mos e internalizojnë këtë, pasi nuk janë kushte që i janë vënë opozitës, por palës që po e kërkon themelimin e Asociacionit.
“Këto kushte nuk ua kam vënë juve, nuk keni nevojë të internalizoni, nuk pati kundërshtim konkret, ju falënderoj që asnjëri nuk kërkuat që të largohen njëra nga këto kushte”, ka thënë Kurti.
“Ju nuk e kërkoni Asociacionin, janë kushte për ata që e kërkojnë Asociacionin, shpreha kushtet e Republikës së Kosovës për çfarëdo Asociacioni që kërkohet në të ardhmen, nuk janë kushte që po ua vë si opozitë”.
Ndryshe, Kurti në seancën e së enjtes ka vendosur gjashtë kushte, në të cilat, do të zbatohej Asociacioni i komunave me shumicë serbe.
- Asociacioni të bëhet në përputhje me Kushtetutën dhe ligjet në fuqi në Republikën e Kosovës.
- Asociacioni nuk mund të jetë monoetnik, duhet të ndërrojë emrin, nuk mund të ketë asnjë pushtet publik apo ekzekutiv, duhet t’i shërbejë vetëm bashkëpunimit horizontal të komunave, sipas kushtetutës.
- Të drejtat e pakicave kombëtare duhet ta ngërthejnë parimin e reciprocitetit ndërmjet dy shteteve si dhe të marrin parasysh standardet dhe modelet evropiane.
- Para vendosjes së asociacionit, strukturat ilegale në veri të shuhen dhe bëhet dorëzimi i të gjitha armëve ilegale.
- Asociacioni është pjesë e marrëveshjes finale dhe zbatohet pas njohjes reciproke dhe vetëm pasi Serbia t’i ketë pranuar parimet e kartës së OKB-së në raportet e saj ndërshetërore me Kosovën.
- Presidenti i Serbisë i tërheq letrat e dërguara në pesë shtetet e BE-se për mospranimin e aplikimit të Kosovës në BE.
Këto kushte i ka kundërshtuar opozita, duke thënë se heqja e armëve në veri të Kosovës nuk është çështje e dialogut, por përgjegjësi e kryeministrit të Kosovës, Albin Kurti.