Kryeministri i Kosovës, Albin Kurti, ka reaguar në gjashtëvjetorin e vrasjes së politikanit opozitar serb në Kosovë, Oliver Ivanoviq.
Kurti, përmes një postimi në platformën X, ka thënë se sot, gjashtë vjet pas vrasjes së tij, vrasësit e Ivanoviqit ende janë të lirë në Serbi.
Kurti ka thënë se Ivanoviq ka qenë aktiv gjatë të dyjave: luftës ’98-’99 dhe dëbimit të shkurtit 2000 të mijëra shqiptarëve nga veriu.
“Beogradi i frikësohej atij si dëshmitar të mundshëm të EULEX-it”, ka shkruar kreu i ekzekutivit.
Oliver Ivanovic was active during both: ‘98-‘99 war & the Feb. 2000 expulsion of thousands of Albanians from the north. Belgrade feared him as a possible EULEX witness. Today, 6 yrs. after his assassination in North Mitrovica, his killers still roam free in Serbia.
— Albin Kurti (@albinkurti) January 16, 2024
Ndryshe, përvjetori i gjashtë i vrasjes së politikanit opozitar serb në Kosovë, Oliver Ivanoviq, është shënuar mëngjesin e së hënës para zyrave të partisë së tij, Iniciativa qytetare Liria, Demokracia dhe Drejtësia (SDP) në Mitrovicën e Veriut, ku edhe është vrarë.
Në mëngjesin e 16 janarit, miqtë dhe admiruesit e Ivanoviqit kanë ndezur qirinj në orën 08:15, kur është kryer atentati ndaj tij.
Ai është vrarë me gjashtë plumba në shpinë para objektit të partisë së tij.
Lexo dhe: Ndizen qirinj në përvjetorin e gjashtë të vrasjes së Oliver Ivanoviqit
E pranishme ka qenë edhe gruaja e Ivanoviqit, Marina.
Në emër të familjes dhe miqve ka folur Dejan Nedelkoviq, i cili ka falënderuar të pranishmit, por nuk ka pranuar të deklarohet, duke thënë se përgjatë gjashtë vjetëve ka thënë gjithçka për vrasjen.