Kryeministri I Kosovës, Albin Kurti ka thënë se së bashku me ministrin e Shëndetësisë, Arben Vitia kanë vizituar të mërkurën komunën e Leposaviqit, për shqyrtimin e një mundësie për krijimin e një materniteti.
Ai ka thënë gjatë mbledhjes së Qeverisë se ky maternitet do t’i plotësonte kërkesat e grave nga Leposaviqit dhe të mos kenë nevojë të kalojnë kufirin në Novi Pazar për trajtim shëndetësor.
“Bashkë me ministrin Vitia pamë nga afër edhe një objekt, një ndërtesë për ta vlerësuar mundësinë e kthimit të saj në maternitet që i plotëson nevojat e grave nga Leposaviqi në mënyrë që ato të mos kenë nevojë për të kaluar kufirin e për të udhëtuar me dhjetëra kilometra deri në Novi Pazar e ku më pastaj po ia regjistrojnë foshnjat si banorë të Serbisë”, tha Kurti.
Ai tha se duhet të bëhet ndërgjegjësimi ndaj kancerit të gjirit ,e për këtë do të ketë edhe mamografi në Viti.
“Pas Leposaviqit, mamografi do të vazhdoj në Viti. Gjatë qëndrimit në Leposaviq, pamë një ndërtesë për ta mundësuar kthimin e saj në maternitet që i plotëson nevojat e grave të kësaj komuna që të mos kenë nevojë të kalojnë kufirin”, tha Kurti, teksa foli edhe për vendimin për rritjen e pensioneve.