Kryeministri i Republikës së Kosovës, Albin Kurti, ka pritur në takim gjeneralët Brigade, Joachim Hoppe dhe gjeneral Brigade, Ralf Hammerstein, drejtor i ekipit këshillues dhe ndërlidhës të NATO-s (NALT) në Ministrinë e Mbrojtjes dhe Forcën e Sigurisë së Kosovës.
Me anë të një njoftimi, Zyra e Kryeministrit ka bërë të ditur se Kurti ka falënderuar gjeneralin Hoppe, i cili gjendet në përfundimin e tij si drejtor i NALT-së, për mbështetjen e tij në avancimin profesional të FSK-së.
“Gjenerali Hoppe këto ditë e përfundon mandatin si drejtor i NALT, dhe këtë detyrë do të fillojë ta ushtrojë gjeneral Hammerstein. Kryeministri Kurti falënderoi atë për qasjen e vazhdueshme bashkëpunuese dhe konstruktive me institucionet e Republikës së Kosovës, me theks të veçantë, për mbështetjen e pakursyer të tij dhe ekipit të tij për ngritjen profesionale të Forcës së Sigurisë së Kosovës dhe zhvillimin e Ministrisë së Mbrojtjes. Gjeneral Hoppe gjatë mandatit të tij, së bashku me ekipin e tij dha kontribut të theksuar në hartimin e politikave të mjekësisë ushtarake, si dhe fusha të tjera që ndërlidhen me planifikimin strategjik në Ministri të Mbrojtjes dhe FSK”, thuhet në njoftim.
Njëherit, kryeministri Kurti e uroi gjeneralin Hammerstein për detyrën dhe përgjegjësinë e re si drejtori i NALT dhe e siguroi atë që bashkëpunimi me ekipin e NALT do të vazhdojë me synim avancimin e mëtejmë.