Ministri për Evropë i Mbretërisë së Bashkuar, Leo Docherty, të premten e 16 dhjetorit do të jetë në Kosovë.
Ai do të pritet në takim nga kryeministri i Kosovës, Albin Kurti.
“Kryeministri i Republikës së Kosovës, Albin Kurti, pret në takim Ministrin për Evropë të Mbretërisë së Bashkuar, Leo Docherty”, thuhet në njoftimin e Zyrës së Kryeministrit.
Ndryshe, të enjten e 15 dhjetorit, Kosova ka aplikuar për anëtarësim në Bashkimin Evropian.
Kryeministri i Kosovës, Albin Kurti, ka dorëzuar aplikimin në Republikën çeke, vendin që aktualisht e kryeson Presidencën e BE-së.
Ceremonia e dorëzimit është mbajtur në ndërtesën e Qeverisë çeke, në Pragë.
“Është një ditë historike për popullin e Kosovës dhe një ditë e jashtëzakonshme për demokracinë në Evropë. Letra që kam sjellë bart shpresat dhe ëndrrat e qytetarëve tanë që kanë punuar me shumë zell për të arritur këtë ditë”.
Kështu ka thënë kryeministri i Kosovës, Albin Kurti, gjatë konferencës së përbashkët me ministrin çek, Mikullash Bek, në Pragë, gjatë dorëzimit të aplikimit të Kosovës për anëtarësim në Bashkimin Evropian.
“Kemi ardhur në Pragë, qytetin në zemër të Evropës për të riafirmuar zotimin e pandryshueshëm të Kosovës ndaj vlerave themelore të BE-së, lirisë, demokracisë, të drejtave të njeriut, barazisë dhe sundimit të ligjit, duke dorëzuar aplikacionin e Kosovës për anëtarësim në BE”.
Ai ka thënë se BE-ja është “destinacioni që synojmë dhe është fati që përqafojmë”.