Kryeministri i Kosovës, Albin Kurti ka thënë se Serbia me sulmin terrorist të 24 shtatorit ka dashur të destabilizojë Kosovën.
Në një intervistë për SkyNews, kreu i ekzekutivit ka thënë se ky akt agresioni paraqet cenim të sigurisë kombëtare.
“Ata donin të fillonin një luftë të re sepse donin të destabilizonin Kosovën. Ky akt agresioni paraqet cenim të integritetit tonë territorial, sovranitetit shtetëror dhe sigurisë kombëtare”, ka thënë Kurti.
Kurti është shprehur se grupi terrorist serb provoi të destabilizojë vendin por dështoi.
Në të njëjtën kohë ai ka thënë se se duhet të jemi të përgatitur për përpjekje të ngjashme edhe në të ardhmen nga ana e Serbisë, të cilat sipas tij të njëjtat duhet të dështojnë përsëri.
“Ata u përpoqën të destabilizojnë vendin tonë dhe dështuan, a do të provojnë përsëri? Nuk mund të them me siguri, por qëllimet e tyre politike, mosnjohja e tyre e vendit tonë dhe mospërballja e tyre me krimet e kryera në të kaluarën nuk po ndryshojnë, kështu që mendoj se ne më mirë është të jemi të përgatitur për përpjekje të ngjashme në të ardhmen, të cilat duhet të tregojmë se do të dështojnë përsëri”, ka thënë tutje kryeministri Kurti.