Kryeministri i Kosovës, Albin Kurti, ka deklaruar se edhe pse ka pasur dallime në qasje, Shtetet e Bashkuara të Amerikës mbeten një partner kyç, me të cilin, ata do të konsultohen gjithmonë.
Nëpërmjet një postimi në rrjetin soical, Twitter, Kurti ka njoftuar se ka biseduar me medien e njohur Financial Times në Bratisllavë, pasi presidentja e Komisionit Evropian, Ursula von der Leyen, kishte shpallur planin e Komisionit Evropian për të afruar Ballkanin Perëndimor me Tregun e Vetëm.
Kujtojmë se, sekretari amerikan i Shtetit, Antony Blinken, kishte reaguar ashpër më 26 maj, duke i kërkuar Kosovës t’i ndalë “masat e dhunshme”. Ai ka thënë se veprimet e autoriteteve të Kosovës do të rezultojnë me pasoja në raportet ndërmjet Uashingtonit dhe Prishtinës.
Në veri të Kosovës janë shtuar tensionet më 26 maj, pasi Policia e Kosovës ka ndërhyrë për t’ia mundësuar hyrjen e kryetarëve të rinj në objektet komunale në Zubin Potok, Leposaviq dhe Zveçan.
Përplasje ndërmjet pjesëtarëve të KFOR-it dhe grupeve të qytetarëve serbë që kanë protestuar para objekteve komunale, në këto komuna të banuara me shumicë serbe, janë shënuar të hënën e 29 majit. Ato, madje, kanë rezultuar me dhjetëra të lënduar nga të dy palët.
Po ashtu, Shtetet e Bashkuara dhe aleatët thanë se përdorimi i forcës minon përpjekjet për normalizimin e marrëdhënieve Kosovë-Serbi dhe bënë thirrje për qetësim të situatës.