Kryeministri i Kosovës, Albin Kurti, është pritur në takim nga Papa Françesku në Vatikan. Ndërsa, kjo ishte vizita e parë zyrtare e kryeministrit Kurti në Vatikan dhe takimi i parë i tij me Papa Françeskun.
“Në këtë takim të përzemërt, në mëngjesin e ditës më të gjatë të vitit, siç veçoi kryeministri në takim, ai u shpreh falënderues dhe shumë i lumtur për mikpritjen kaq dashamirëse”, thuhet në komunikatën e kryeministrisë së Kosovës.
Kurti bisedoi me Papën për rininë e vendit, figurën e Nënë Terezës, trashëgiminë dhe bashkëjetesën multifetare në Kosovë.
“Ai tha se Republika e Kosovës është e përcaktuar për paqe, dialog dhe bashkëpunim. Me Papa Françeskun, biseduan për rininë dhe ardhmërinë, për figurën, veprën dhe trashëgiminë e Nënës Terezë, për Letnicën e Vitisë ku asaj i erdhi thirrja për devocion, dhe për bashkëjetesën multi-fetare në Kosovë. Kryeministri më tej e njoftoi Atin e Shenjtë edhe për suksesin demokratik dhe ekonomik të vendit, dhe për arritjet e qeverisjes së deritanishme, duke theksuar faktin që jemi qeveria e parë që po ndanë shtesa për nënat lehona dhe fëmijët deri në moshën 16 vjeç, si politikë mbështetëse për ta”, thuhet në komunikatën e tyre.
Më tej, sipas komunikatës thuhet se e ka ftuar Papa Françeskun që ta vizitojë Kosovën, pas rikuperimit të shpejtë dhe të mirë nga operacioni kirurgjik që kishte së fundmi.
“Ata u pajtuan se duhet që përherë të jemi pranë e me popullin i cili ka nevojë për dashuri dhe drejtësi”, përfundon komunikata e ZKM-së.