Kryeministri i Kosovës, Albin Kurti, ka takuar ministren e Punëve të Jashtme të Japonisë, Yoko Kamikawa. Ky takim përkon me 15-vjetorin e vendosjes së marrëdhënieve diplomatike midis Kosovës dhe Japonisë.
Kryeministri Kurti theksoi vlerën e takimeve të tilla bilaterale, duke shprehur mirënjohjen e thellë për mbështetjen e palëkundur të Japonisë.
“Këtë vit, po shënojmë 15-vjetorin e vendosjes së marrëdhënieve diplomatike. Japonia është një nga vendet e para që na ka njohur. Prej atëherë, ajo është ndër partneret më të afërta dhe aleatët më të mirë që kemi”, ka thënë tha Kurti.
Vizita e Ministres Kamikawa është e rëndësishme, pasi është vizita e saj e parë në Kosovë dhe e para e një ministreje të Jashtme Japoneze.
“Patëm kënaqësinë ta mirëpresim sot ministren e Punëve të Jashtme të Japonisë, Yoko Kamikawa, në vizitën e saj të parë në Kosovë dhe të një ministreje japoneze të Punëve të Jashtme. Çdo takim bilateral është mundësi e çmueshme për të shprehur mirënjohjen për ndihmën e mbështetjen e vazhdueshme dhe për të shtuar bashkëpunimin ndërshtetëror. I tillë ishte ky sot”, ka shtuar Kurti.