Kryeministri i Kosovës, Albin Kurti, me rastin e 15-vjetorit të hyrjes në fuqi të Kushtetutës, ka thënë se duhet të ruhen vlerat që i përcakton Kushtetuta.
Vetëm katër muaj pas shpalljes së Pavarësisë së Kosovës, më 15 qershor të vitit 2008, ka hyrë në fuqi Kushtetuta e saj, e cila e përcakton Kosovën si shtet të pavarur, sovran, demokratik, unik dhe të pandashëm.
“15 vjet më parë, Kushtetuta jonë ka hyrë në fuqi. Si shumë të tjera, e jona është një përzierje idealesh parimore dhe koncesione pragmatike. Le të mos dështojmë kurrë në ruajtjen dhe mbrojtjen e vlerave të saj më të mëdha – të tilla si të drejtat e njeriut, zgjedhjet e lira dhe të ndershme, integriteti territorial dhe sundimi i ligjit”, ka shkruar ai në Twitter.
15 years ago, our Constitution came into force. Like many others, ours is a mix of principled ideals & pragmatic concessions. May we never fail to preserve, protect and defend its greatest values—such as human rights, free & fair elections, territorial integrity and rule of law.
— Albin Kurti (@albinkurti) June 15, 2023
Republika e Kosovës është shtet laik, shoqëri shumetnike, e përbërë nga shqiptarët dhe komunitete të tjera, thuhet në tekstin e Kushtetutës, me hyrjen në fuqi të së cilës fillon zbatimi i planit të ish-kryenegociatorit të Kombeve të Bashkuara, Martti Ahtisaari.
Hyrja në fuqi e Kushtetutës së Kosovës shënon fillimin e një periudhe të re të zhvillimeve politike.
Kushtetuta hyn në fuqi 120 ditë pas shpalljes së pavarësisë.
Institucionet e Kosovës kanë arritur që për një periudhë të shkurtër kohore të përgatisin dhe të miratojnë 40 ligje që dalin si propozim nga Pakoja e Ahtisaari-t.
Hyrja në fuqi e Kushtetutës kundërshtohet nga përfaqësuesit e serbëve të cilët nuk janë pajtuar me shpalljen e pavarësisë së Kosovës, e cila deri tani është njohur nga më shumë se 115 vende të botës.