Kryeministri i Kosovës, Albin Kurti, në adresimin e tij në mbledhjen e qeverisë u ka bërë thirrje qytetarëve që t’i përgjigjen pozitivisht ftesës për regjistrim të popullsisë.
“I bëj thirrje qytetarëve që t’i përgjigjen pozitivisht ftesës për regjistrim të popullsisë. Nuk kemi mangësi vetëm tek shpërputhja e të dhënave por edhe të mungesa e tyre”, ka thënë Kurti.
Kurti ka shtuar se për herë të parë në këtë regjistrim të popullsisë është përfshirë pyetësori për dëmet nga lufta 1998-1999 në ekonomitë familjare.
“Qytetarët do të mund t’i deklarojnë dëmet ekonomike, shumat e pronave të shkatërruara, dëmet në njerëz, familjarë të vrarë, të zhdukur, të plagosur apo të burgosur. Kjo periudhë përfshinë 28 shkurtin 1998 deri më 12 qershor 1999”, ka vijuar Kurti, teksa ka shtuar ky regjistrim do të sigurojë një evidencë të së kaluarës.
Tutje, shefi i ekzekutivit e ka përmendur listën e gjatë të masakrave që këtë muaj kanë përvjetorin e 25-të, duke theksuar se sot ishte te familja Vesa në Gjakovë dhe në Kralan.
Ai ka thënë se Qeveria e tij ka shtuar mbështetjen për familjet që kanë humbur më të afërmit e ka rritur mbështetjen për të dokumentuar me saktësi krimet.
Kurti e ka cilësuar urgjente çështjen e adresimit të krimeve të luftës në Kosovë, duke thënë se për krimet e Serbisë janë duke humbur dëshmitarët.
“Është çështje urgjente adresimi i krimeve të luftës sidomos për shkak se me kalimin e viteve jemi duke i humbur dëshmitarët. Dëshmitë janë aty, por jemi duke i humbur dëshmitarët sepse u bë çerekshekulli nga lufta e fundit në Kosovë”, është shprehur Kurti.