Kryeministri i Kosovës, Albin Kurti, në Ditën Ndërkombëtare për Eliminimin e Dhunës Kundër Grave, përmes një videoje, ka thënë se dhuna në familje dhe ajo me bazë gjinore dënohet, prandaj rastet e dhunës nuk duhet të mbahen të heshtura.
“Dhuna në familje e dhuna me bazë gjinore nuk është çështje private. Nuk mund të mbetet prapa dyerve të mbyllura të shtëpisë, apo e izoluar. Duhet të raportohen. Një në tri gra gjatë jetës së saj, pavarësisht prejardhjes, moshës a profesionit, preket nga ndonjë lloj i dhunës”, ka deklaruar Kurti.
Ndër të tjera, Kurti ka thënë se dhuna nuk tolerohet dhe se siguria, mirëqenia dhe dinjiteti i grave duhet të mbrohen.
“Zinxhiri i reagimit për rastet e dhunës në familje do të forcohet”, ka vijuar tutje.
Shefi i ekzekutivit u ka bërë thirrje të gjitha grave e vajzave që të raportojnë dhunën ndaj tyre.
“Po ashtu, u bëj thirrje institucioneve përgjegjëse që ta trajtojnë me prioritet dhe me seriozitetin më të lartë këtë krim”.
“Andaj, raporto dhunën. Raportimi është hapi i parë drejt adresimit të këtij krimi. As edhe një më shumë”.
Po në këtë ditë, në Prishtinë u raportua për një vrasje të rëndë.
Pas lajmit për një vrasje në Prishtinë, të cilën Policia e Kosovës e ka cilësuar si të rëndë, Prokuroria Themelore në Prishtinë ka dalë me detaje tronditëse.
Në komunikatën e tyre thuhet se burri me inicialet I.G i cili u vetëdorëzua në polici, dyshohet se me sëpatë e ka privuar nga jeta bashkëshorten e tij.
Prokuroria ka bërë të ditur se burri është ndaluar nën dyshimet për vrasje të rëndë.
Prokuroria jep detaje, dyshohet se burri e vrau gruan e tij me sëpatë