I pari i Qeverisë së Kosovës, Albin Kurti, me rastin e festës së 7 Marsit, ka vizituar dy persona të rëndësishëm për të, të cilët kanë pasur profesion mësuesinë.
Kryeministri Kurti ka vizituar mësuesin Osman Jakupi, me të cilin, kishte qenë bashkë në burgjet e Serbisë.
“Me mësuesin Osman Jakupi nga Baksi ishim bashkë në burgjet e Serbisë. Ai ishte i plagosur e i burgosur, i malltretuar edhe në spital, përveçse i torturuar në burg. Katër anëtarë të familjes i ka të vrarë gjatë luftës, e vetë mësues me ditar në dorë për 45 vjet e 5 muaj”, ka treguar Kurti shkurtimisht historinë e mësuesit Osman.
Kreu i ekzekutivit gjatë ditës ka vizituar edhe Afërditën, e cila është vajza e mësueses së Kurtit.
“Ndërkaq, Afërdita është vajza e vetme e mësueses sime, Nafije Dobruna-Deva. Kur unë isha nxënës i fillores, Afërdita ishte studente e Matematikës, pastaj ajo u bë profesoreshë në Gjimnaz e mandej asistente në Fakultet të Ndërtimtarisë në lëndët Matematikë I, II dhe III. Sot, më 7 Mars, i takova për t’ua uruar Ditën e Mësuesit”, ka përfunduar Kurti në postimin e tij në rrjetin social Facebook.