Kryetarja e Grupit Parlamentar të Lëvizjes Vetëvendosje, Mimoza Kusari-Lila, ka reaguar në lidhje me kidnapimin e tre policëve brenda territorit të Kosovës nga policia serbe.
Kusari – Lila ka theksuar se kjo është një shtrirje e ndërhyrjes së dhunshme e Serbisë në Kosovë pas ngjarjeve në veri.
“Tre policë kufitarë të Kosovës janë rrëmbyer sot brenda territorit nga xhandarmëria serbe. Kjo është një shtrirje e ndërhyrjes së dhunshme e Serbisë në Kosovë pas ngjarjeve në veri”, ka deklaruar ajo.
Po ashtu, ajo i ka bërë thirrje komunitetit ndërkombëtar që të reagojë në përputhje me rrethanat.
“Vetëm agresori në këto ngjarje të dhunshme banon në Beograd dhe komuniteti ndërkombëtar duhet të reagojë në përputhje me rrethanat”, ka shkruar ajo në Twitter.
Policia e Kosovës gjatë ditës ka bërë të ditur se tre zyrtarët e saj policorë dyshohet të jenë kidnapuar në territorin e Kosovës në veri të vendit, përkatësisht në komunën e Leposaviqit.
Po ashtu, në lidhje me kidnapimin e tyre ka reaguar edhe kryeministri Kurti, i cili ka kërkuar ndihmë nga ndërkombëtarët që ata të lirohen menjëherë.
Sipas tij, kjo është hakmarrje nga ana e Serbisë ndaj arrestimit të djeshëm të serbit me nofkën “Llune”.
Pas kidnapimit të tre policëve të Kosovës nga policia e Serbisë, RTV Dukagjini ka mësuar se janë bllokuar të gjitha mallrat serbe të hyjnë në Kosovë.