Juristja për media, Flutra Kusari, ka paralajmëruar se mediumi Klan Kosova ka mundësi të mbyllet.
Sipas saj, “rreziku është serioz dhe real”. Ajo ka vazhduar duke e sqaruar pse mund të mbyllet mediumi.
Ajo e ka quajtur vendimin e ARRBK-së, politik për suspendimin e certifikatës së biznesit Klan Kosova.
“Komisioni për Shqyrtimin e Ankesave për Regjistrimin e Bizneseve në MINT i ka edhe tre dite afat me vendosë për ankesën e Klan Kosovës kundër vendimit politik të tyre për suspendimin e certifikatës së biznesit të Klan Kosova”.
“Nëse Komisioni e refuzon ankesën, atëherë brenda një periudhë shumë të shkurtër (nëse procedura gjyqësore dështon) redaksisë së Klan Kosovës do t’i vihet çelësi”, ka shkruar ajo në Facebook.
Më tutje, ajo ka pretenduar se ajo çfarë po pritet të ndodhë me Klan Kosovën është vetëm një proces politik dhe jo i ligjshëm.
“Ky nuk është proces administrativ apo i ligjshëm, është proces politik. E kuptoj që mediat dhe gazetarët janë shumë të zënë me shumë zhvillime, por i lus shumë që t’i kushtojnë kohë këtij zhvillimi”, ka shtuar ajo.
Ndërkohë, ajo ka përfunduar duke thënë se nëse mbyllet Klan Kosova do të krijohet precedenti për mbylljen edhe të mediave të tjera.
“Ky proces nuk ka të bëjë vetëm me Klan Kosova, ka të bëjë me precedentin që krijohet dhe që pastaj mund të zbatohet për të gjitha mediat tjera”, ka përfunduar ajo.