Ish-futbollisti, Taulant Dajaku dhe opinionisti, Alban Lumi, ishin të ftuar në emisionin “Rreth e Rrotull” në RTV Dukagjini për të diskutuar se kush do të jetë selektor i ardhshëm i Kosovës.
Opinionisti Alban Lumi ka thënë se për tu zgjedhur selektor i Kosovës duhet të jenë kriteret bazë dhe se selektori i zgjedhur duhet të jetë me autoritet.
“Ata që vendosin për këtë punë kanë vendosur që kriteri të jetë i tillë, që të jetë një selektor i ardhshëm me autoritet, ndonjë selektor i ardhshëm që ka përvojë. Po besoj që duhet një si profili i Morenos”, ka thënë Lumi.
Ai është shprehur se duhet të zgjidhet një selektor me përvojë jashtë vendit në mënyrë që të njëjtën përvojë ta bartë edhe në ekipin e Kosovës.
Sipas tij, në fund të janarit ose në fillim të shkurtit do të zgjidhet selektori i ardhshëm i Kosovës.
Ndërsa ish-futbollisti, Taulant Dajaku, ka thënë se pas “katër dështimeve” tashmë e kemi kuptuar që selektorët e zgjedhur më herët nuk i kanë pasur kriteret bazë.
“Puna e selektorit është shumë kompleksive, i duhet dikush që vjen dhe e ka kohën e duhur të punojë sepse nuk ndodhë vetëm në ato ditët që janë grumbullimet, prandaj do të duhej të zgjidhej selektori që tani. Sepse në planin e vet, ekipen e vet mund të punojë në shumë dimensione”, ka thënë Dajaku.
Sipas tij, është shumë e rëndësishme të bëhet ndërtimi i një strukture funksionale të ekipit Kosovar.
“Nuk është çështja tek emri i trajnerit, është tek ndërtimi i një strukture funksionale dhe të vërtetë”, ka thënë ish-futbollisti.