Pas 35 përpjekjeve të dështuara, Kuvendi i Kosovës do të mbajë sot, e hënë, vazhdimin e 36-të të seancës konstituive.
Seanca pritet të nisë në orën 11:00, ndërsa në rend dite mbetet krijimi i Komisionit për votim të fshehtë, për zgjedhjen e kryetarit të Kuvendit.
Në seancën e fundit, të mbajtur të shtunën, ishin 51 vota pro formimit të këtij komisioni.
Partia Demokratike e Kosovës (PDK), Lidhja Demokratike e Kosovës (LDK), Aleanca për Ardhmërinë e Kosovës (AAK) dhe Lista Serbe në çdo seancë tashmë nuk propozojnë nga një anëtar për formimin e komisionit për votim të fshehtë për kandidaten e Vetëvendosjes, Albulena Haxhiu, për kryetare të Kuvendit, meqë Haxhiu nuk ka arritur të marrë 61 votat e domosdoshme në votimin e hapur.