Xhudistja kosovare Laura Fazliu është ndalur në çerekfinale të Kampionatit Botëror, pasi u mposht nga njëra prej emrave më të mëdhenj të këtij sporti, brazilianja Rafaela Silva.
Ndeshja u vendos që në minutën e parë, kur Silva realizoi një hedhje të bukur për Ippon, duke e zënë të papërgatitur Fazliun në aksionin e parë të vërtetë.
Me këtë fitore, Silva u kualifikua në gjysmëfinale, ndërsa Laura Fazliu do të kërkojë medaljen e bronztë përmes repesazhit.
Për të siguruar këtë medalje, asaj i nevojiten dy fitore.
Në ndeshjen e parë të repesazhit, Fazliu do të përballet me xhudisten mongole Enkhriilen Lkhagvatogoo.
Rafaela Silva, 33-vjeçare, është një nga legjendat e xhudos botërore.
Ajo ka fituar medalje të artë olimpike në Lojërat e Rio 2016, dy tituj kampione bote dhe një mori medaljesh të tjera të rëndësishme në karrierën e saj.