Lidhja Demokratike e Kosovës (LDK) i është përgjigjur letrës së kryetarit të PDK-së, Memli Krasniqit, i cili kërkoi shpërndarjen e Kuvendit deri më 29 maj.
Zëdhënësi i LDK-së, Besian Mustafa, deklaroi se përgjigjen dhe qëndrimin e LDK-së ia kanë kthyer tashmë “ideatorit të vërtetë të kësaj nisme”, kryetarit të VV-së, Albin Kurti.
“Përgjigjen dhe qëndrimin e Lidhjes Demokratike të Kosovës ia kemi kthyer tashmë ideatorit të vërtetë të kësaj nisme, kryetarit të Lëvizjes Vetëvendosje z. Albin Kurtit”, ka thënë Mustafa për “Telegrafin”.
Lidhja Demokratike e Kosovës, që një kohë po ripërsërit qëndrimin e saj lidhur me këtë temë.
Sipas LDK-së, është e rëndësishme mënyra se si shkohet në zgjedhje.
Andaj, sipas Mustafës, Kurti së pari duhet të japë dorëheqje, pastaj procedurat e tjera diskutohen në vazhdim.
Kryetari i PDK-së, Memli Krasniqi, në letrën drejtuar liderëve të partive parlamentare ka shprehur qëndrimin se zgjedhjet sot janë domosdoshmëri duke kërkuar koordinim e hapa konkretë.
Ai u shpreh se 30 qershori dhe 7 korriku janë propozuar si data për mbajtjen e zgjedhjeve.
Sipas tij, për të arritur ndonjërën nga to, shpërndarja e Kuvendit duhet të votohet më së largu më 29 maj.
Krasniqi e Kurti para një jave u takuan dhe diskutuan për zgjedhjet e reja.
Të dyja partitë janë shprehur pro shpërndarjes së Kuvendit, ndërsa dy partitë e tjera parlamentare, LDK-ja dhe AAK-ja, kanë kërkuar dorëheqjen ose shkarkimin e Kurtit.