Lidhja Demokratike e Kosovës e ka akuzuar Qeverinë e Kosovës për paaftësi, duke thënë se kjo qeverisje po i kushton shtrenjtë vendit.
Në një postim në Facebook, LDK-ja thotë se kjo qeveri, që erdhi me premtimin për rritje të prodhimit vendor dhe zvogëlim të varësisë nga importi, rriti vetëm deficitin tregtar.
“5 miliardë euro është vlera e deficitit tregtar, rekord për periudhën e pasluftës. Rritje rekorde e importeve, përfshirë rritje të importit të grurit, miellit, qumështit dhe energjisë elektrike. Ky pushtet është i paaftë! Kjo qeverisje po i kushton Kosovës shtrenjtë”, thuhet në postimin e LDK-së.
Sipas LDK-së, nuk është bërë asnjë reformë fiskale, që do të nxiste rritjen e prodhimit vendor.
Pos kësaj, LDK-ja vlerëson se nuk është bërë asnjë investim i huaj në prodhim.