Lidhja Demokratike e Kosovës (LDK) ka reaguar ndaj tensioneve të mbrëmjes të së dielës në Veri të Mitrovicës, duke kritikuar Qeverinë e Kosovës, e cila sipas saj, nuk ishte koordinuar me askënd dhe nuk ishte e përgatitur për situatën e djeshme.
Pas pëfundimit të një konference nga Çitaku nga radhët e PDK-së, LDK-ja ka thënë se opozita mund ta ndihmojë qeverinë, por jo edhe të marrë përsipër gabimet e saj.
“Opozita duhet të konsultohet dhe të dëgjohet para se të ndërmerren veprimet. Opozita mund të ndihmojë Qeverinë që të mos gabojë, por nuk mund të marrë përsipër dështimet e saj. Mbështesim vendosjen e reciprocitetit, si masë e drejtë e çdo shteti sovran. Në të njëjtën kohë, koordinimi me aleatët tanë është kërkesë e përhershme e Lidhjes Demokratike të Kosovës. Ky koordinim është kushti i vetëm i suksesit”, ka shkruar LDK.
Sipas LDK-së, opozita do të duhej të dëgjonte para se t’i merrte vendimet.
Më herët, në një konferencë për media, e cila erdhi sikurse një reagim nga ana e Partisë Demokratike të Kosovës (PDK), Çitaku ka thënë se situata e mbrëmshme ka vërtetuar që aksioni për reciprocitetin e pjesshëm nuk ka qenë një veprim i menduar mirë, e aq më pak një veprim në koordinim me aleatët ndërkombëtarë.
Çitaku: Nuk është koha për protagonizëm politik, por për pjekuri politike