Lidhja Demokratike e Kosovës, i ka shprehur pakënaqësitë e saj në lidhje me vlerën e koeficientit për paga të propozuar nga Qeveria e Kosovës.
Kryetari i kësaj partie Lumir Abdixhiku, ka thënë se vlera e koeficientit të pagave duhet të jetë 125 dhe jo 105.
“Zgjidhja është e qartë. Koeficienti 125”, thuhet në reagimin e tij.
Abdixhiku tha se propozimi i tyre merr 120 milionë euro shtesë por që sipas tij është i mundshëm.
“Propozimi ynë është i drejtë sepse merr për bazë inflacionin rekord që e kemi patur në vend. Propozimi ynë është i mundshëm sepse merr 120 milionë shtesë, shumë më pak se që ka shpenzuar Qeveria në pako që nuk kanë lënë as edhe një shenjë. Propozimi ynë është i qëndrueshëm sepse pagat si proporcion buxhetor i mbanë nën 27%. Propozimi ynë është i denjë sepse krijon paga të dinjitetshme si asnjëherë më parë në vend”, ka shkruar Abdixhiku.
Abdixhiku e ka paraqitur një grafikë ku janë krahasuar pagat e punëtorëve të sektorit publikë nëse koeficienti do të ishte 125 me koeficientin ekzistues që është 105.
Pagat e mësimdhënësve me koeficientin 125 do të ishin 700 euro kurse me koeficientin 105 të propozuart nga Qeveria 588 euro.
Pagat e mjekëve me koeficient 125 do të ishin 925 euro kurse me këtë aktual 777 euro.
Të policëve me koeficient 125 do të ishin 625 euro kurse me këtë aktual 525 euro.
Të ushtarëve me koeficient 125 do të ishin 700 euro kurse me këtë aktual 588 euro.
Të zjarrfikësve me koeficient 125 do të ishin 625 euro kurse më këtë aktual 525 euro.
Vlerën e koeficientit për paga e kanë kundërshtuar të gjitha partitë opozitare, madje kanë paralajmëruar se do ta dërgojnë edhe në Gjykatë Kushtetuese.