Kryetari i Nisma Socialdemokrate, Fatmir Limaj, ka kujtuar aktgjykimin lirues nga Gjykata Ndërkombëtare e Hagës, 20 vjet më parë.
Limaj vlerëson se gjykata foli qartë se lufta e Ushtrisë Çlirimtare e Kosovës ishte e drejtë, e pastër dhe në mbrojtje të një populli që luftoi për të jetuar i lirë, njofton Dukagjini.
Megjithatë, Limaj thotë se ballafaqimi me drejtësinë në Hagë ishte i gjatë e sfidues.
“Sot bëhen 20 vjet nga aktgjykimi lirues i Gjykatës Ndërkombëtare të Hagës, e cila foli qartë: lufta e Ushtrisë Çlirimtare të Kosovës ishte e drejtë, e pastër dhe në mbrojtje të një populli që luftoi për të jetuar i lirë. Gjykimi ndaj meje dhe dy bashkëluftëtarëve të mi, Isakut dhe Haredinit, fatkeqësisht doli të jetë aktakuza e parë gjyqësore në Hagë kundër pjesëtarëve të UÇK-së. Ballafaqimi ynë gjyqësor në Hagë ishte i gjatë dhe sfidues. Në atë kohë Kosova nuk ishte shtet dhe ne ishim pa asnjë përkujdesje institucionale, pa mbrojtje të organizuar, ashtu siç do të duhej ta kishim në një proces të tillë gjyqësor. Edhe ne si individë, edhe e vërteta e luftës sonë çlirimtare, për herë të parë po sfidoheshin në nivelet e drejtësisë ndërkombëtare në Hagë. Në gjithë këtë proces e kishim të vërtetën e UÇK-së dhe mbështetjen e popullit”, ka shkruar Limaj.
Tutje, Limaj thotë se është e trishtë që edhe pas 20 vjetëve lufta çlirimtare po testohet e sfidohet në Hagë teksa shton se është i bindur që ish-krerët e UÇK-së që ndodhen atje së shpejti do të kthehen të lirë në Kosovë.
“Është trishtuese që edhe sot, pas 20 viteve, lufta jonë çlirimtare vazhdon të testohet e sfidohet po në Hagë, në gjykimin e bashkëluftëtarëve tanë. Akuzat, shpifjet dhe fabrikimet kundër UÇK-së nuk kanë të ndalur edhe pas 20 viteve. Unë jam i bindur që bashkëluftëtarët tanë së shpejti do të kthehen të lirë në Kosovë. Mbese me shpresë që përfundimisht të marrin fund shpifjet dhe fabrikimet për luftën tonë çlirimtare. Po ashtu, është trishtuese kur sheh tani që Kosova, edhe pse është shtet, po bën fare pak në mbrojtje të historisë dhe së vërtetës së vet, mbi të cilën është ndërtuar ky shtet. Përjetësisht krenar me luftën tonë çlirimtare; ajo nuk mund të njolloset; ajo është e pastër si loti”, ka shkruar Limaj.