14:00 – Rubio informoi krerët e Kongresit para sulmeve në Iran
Sekretari amerikan i Shtetit, Marco Rubio, ka njoftuar paraprakisht disa nga ligjvënësit më të lartë të Kongresit përpara sulmeve në Iran — por atyre nuk iu është dhënë një shpjegim i plotë mbi bazën ligjore të veprimit, thanë për CNN disa burime të njohura me çështjen.
Rubio dhe drejtori i CIA-s, John Ratcliffe, kishin zhvilluar më herët gjatë javës një informim të klasifikuar me drejtuesit kryesorë të Kongresit që merren me çështjet e inteligjencës dhe sigurisë kombëtare. Disa prej tyre kanë deklaruar se administrata duhet ta paraqesë publikisht arsyetimin për ndërhyrjen ushtarake.
Sipas burimeve, ndër të informuarit ishin Kryetari i Dhomës së Përfaqësuesve, Mike Johnson, lideri i shumicës në Senat, John Thune, si dhe nënkryetari i Komisionit të Inteligjencës në Senat, Mark Warner.
Më herët gjatë javës, ligjvënësit kryesorë nga të dyja partitë, që drejtojnë komisionet e inteligjencës dhe udhëheqin grupet parlamentare në Kongres, kishin kërkuar të njoftoheshin paraprakisht përpara çdo sulmi të mundshëm.
12:54 – Liderët botërorë reagojnë pas sulmeve të SHBA-së e Izraelit në Iran
Liderë botërorë kanë reaguar pas sulmeve të SHBA-së dhe Izraelit kundër Iranit të shtunën, sulme që Irani po ashtu iu kundërpërgjigj më vonë duke shënjestruar bazat amerikane në Lindjen e Mesme.
Një prej tyre ishte ndërmjetësuesi i bisedimeve Washington-Iran, ministri Badr Albusaidi i Omanit i cili i kërkoi SHBA-së të mos përfshihet në konfliktin rajonal.
“Jam i tronditur. Negociatat aktive dhe serioze janë dëmtuar përsëri. As interesave të Shteteve të Bashkuara dhe as kauzës së paqes globale nuk i shërben kjo. Dhe lutem për të pafajshmit që do të vuajnë. I bëj thirrje Shteteve të Bashkuara të mos përfshihen më tej. Kjo nuk është lufta juaj”, ka thënë Albusaidi.
Presidentja e Komisionit të BE-së, Ursula von der Leyen, ka rikujtuar se blloku evropian ka miratuar “sanksione të gjera” në përgjigje të “regjimit vrasës” të Iranit.
“Ne u bëjmë thirrje të gjitha palëve të ushtrojnë përmbajtje maksimale, të mbrojnë civilët dhe të respektojnë plotësisht ligjin ndërkombëtar”.
Presidenti francez ka bërë thirrje që përshkallëzimi ushtarak i vazhdueshëm të “ndalohet”. Emmanuel Macron theksoi se shpërthimi i luftës “bart pasoja të rënda për paqen dhe sigurinë ndërkombëtare”.
“Regjimi iranian duhet të kuptojë se nuk ka më zgjidhje tjetër përveçse të angazhohet në negociata me mirëbesim për t’i dhënë fund programeve të tij bërthamore dhe balistike, si dhe veprimeve të tij që shkaktojnë destabilizim rajonal. Kjo është absolutisht thelbësore për sigurinë e të gjithëve në Lindjen e Mesme”.
Zyra e kryeministres italiane, Giorgia Meloni, ka shprehur solidaritet me popullsinë civile të Iranit, duke thënë se vazhdon të kërkojë respekt për të drejtat civile dhe politike. Zyra shtoi se Meloni do të konsultohet me aleatët dhe udhëheqësit rajonalë për të mbështetur përpjekjet për të lehtësuar tensionet.
Kryeministri i Australisë, Anthony Albanese, ka theksuar se vendi i tij “qëndron me popullin e guximshëm të Iranit në luftën e tyre kundër shtypjes” dhe se mbështet SHBA-në në përpjekjet për të parandaluar Iranin të pajiset me armë bërthamore.
Një zëdhënës i qeverisë së Mbretërisë së Bashkuar ka thënë se vendi “nuk dëshiron të shohë përshkallëzim të mëtejshëm në një konflikt më të gjerë rajonal”, duke shtuar, “ne jemi të gatshëm të mbrojmë interesat tona”.
Kryeministri spanjoll Pedro Sanchez ka theksuar se Spanja nuk e pranon atë që ai e quajti veprim ushtarak të njëanshëm të kryer nga Shtetet e Bashkuara dhe Izraeli. Ai shtoi se sulmi ndaj Iranit shënon një përshkallëzim të qartë që thellon paqëndrueshmërinë në rajon.
“Ne gjithashtu i hedhim poshtë veprimet e regjimit iranian dhe Gardës Revolucionare. Nuk mund të përballojmë një tjetër luftë të zgjatur dhe shkatërruese në Lindjen e Mesme”, shkroi ai.
Ndërkohë, ministria e jashtme e Rusisë i ka përshkruar veprimet e SHBA-së dhe Izraelit si “të pamatura”, duke thënë se ato shkelin ligjin ndërkombëtar. Rusia bëri thirrje për një kthim në zgjidhjet politike dhe diplomatike.
12:20 – Emiratet e Bashkuara raportojnë një viktimë nga sulmet iraniane
Ministria e Mbrojtjes e Emirateve të Bashkuara Arabe njoftoi se vendi është sulmuar nga “një sulm i hapur me raketa balistike iraniane”.
“Sistemet ajrore të mbrojtjes së Emirateve trajtuan raketat me efikasitet të lartë dhe interceptuan me sukses një numër raketash,” thuhet në deklaratë, shkruan BBC, transmeton Dukagjini.
Megjithatë, ministria njofton se mbetjet e raketave ranë në një zonë banimi në Abu Dhabi, duke shkaktuar dëme materiale dhe duke vrarë një civil me kombësi aziatike, emri i të cilit nuk bëhet publik.
Sulmi është dënuar si “përshkallëzim i rrezikshëm” dhe “akt i pabesë”, ndërsa Emiratet e Bashkuara Arabe theksojnë se “ruajnë të drejtën e plotë për t’iu përgjigjur”.
Forca Ajrore e SHBA-së operon nga baza Al Dhafra, në jug të Abu Dhabit, së bashku me Forcat Ajrore të Emirateve.
12:00 – Linjat ajrore ndalojnë fluturimet drejt Lindjes së Mesme
Të gjitha linjat kryesore ajrore kanë devijuar ose anuluar fluturimet drejt rajonit, duke përmendur arsye sigurie dhe duke u kërkuar falje klientëve.
Virgin Atlantic njoftoi se ka anuluar shërbimin VS400 nga Londra Heathrow drejt Dubai-t dhe paralajmëroi se fluturimet drejt Maldiveve, Indisë dhe Arabisë Saudite mund të kenë kohë më të gjata fluturimi për shkak të ndryshimeve të itinerarit.
British Airways ka anuluar fluturimet drejt Tel Avivit dhe Bahreinit deri të mërkurën, ndërsa shërbimi i sotëm drejt Amanit është gjithashtu pezulluar.
Fluturimi BA123 nga Heathrow drejt Dohas, i cili nise në kohë në orën 20:00 mbrëmë, u detyrua të kthehej një të tretën e rrugës. Disa orë më vonë, më shumë se 200 pasagjerë u gjetën sërish në pistën e Londrës.
Wizz Air konfirmoi se ka pezulluar të gjitha fluturimet drejt dhe nga Izraeli, Dubai, Abu Dhabi dhe Amani me efekt të menjëhershëm deri të shtunën e ardhshme. Fluturimet drejt dhe nga Arabia Saudite do të anulohen deri të martën.
Emirates ka pezulluar përkohësisht operacionet e saj. Lufthansa, Air India dhe Turkish Airlines janë linja të tjera që kanë njoftuar anulime fluturimesh drejt rajonit.
11:30 – Ushtarët iranian paralajmërojnë një “mësim historik” për Izraelin dhe SHBA-në
Ushtarakët iranian thanë se do t’u japin një “mësim historik” Izraelit dhe Shteteve të Bashkuara pas sulmeve në qytetet iraniane.
“Siç kemi theksuar më parë, çdo bazë kudo në rajon që ndihmon Izraelin do të jetë objektiv i Republikës Islamike dhe forcave tona të armatosura, dhe nuk do të hezitojmë aspak,” deklaroi zëdhënësi i lartë i Forcave të Armatosura, Abolfazl Shekarchi, sipas mediave iraniane të lidhura me shtetin.
11:12 – BE: Irani është kërcënim global, eksploroni rrugët diplomatike
“Zhvillimet e fundit në Lindjen e Mesme janë të rrezikshme. Regjimi iranian ka vrarë mijëra njerëz. Programet e tij të raketave balistike dhe ato bërthamore, së bashku me mbështetjen e tij për grupet terroriste, përbëjnë një kërcënim serioz për sigurinë globale.”
Kjo është ajo që shkroi Përfaqësuesja e Lartë e BE-së Kaja Kallas në X.
“Fola me Ministrin e Jashtëm Izraelit Saar dhe ministra të tjerë nga rajoni. BE-ja po punon gjithashtu ngushtë me partnerët arabë për të eksploruar rrugët diplomatike. Mbrojtja e civilëve dhe e drejta ndërkombëtare humanitare janë një përparësi”, shpjegoi Kallas.
11:00 – Irani nis një sulm të paprecedentë në të gjithë Lindjen e Mesme
Sulmet e Iranit në Lindjen e Mesme po ndodhin në një shkallë që nuk është parë më parë. Sipas raportimeve, Teherani po godet objektiva amerikane në disa vende njëkohësisht, me shpërthime të dëgjuara nga plazhet e Dubai-t deri në rrugët e Dohës.
Situata po zhvillohet me shpejtësi, dhe ende nuk është e qartë nëse shpërthimet janë rezultat i interceptimeve të raketave apo të goditjes së objektivave.
Çfarë duket e qartë është se regjimi iranian e sheh këtë moment si një kërcënim ekzistencial dhe vepron me agresivitet dhe shpejtësi. Kur Shtetet e Bashkuara dhe Izraeli goditën Iranin në qershor, ato shënjestruan rezervat e raketave balistike të regjimit, duke kufizuar aftësinë e tij për të kundërpërgjigjur. Tani, Irani mund të përpiqet të përdorë arsenalin e tij para se ta humbasë.
Gjithashtu, duket se regjimi nuk po shqetësohet për marrëdhëniet me fqinjët dhe synon të ndëshkojë SHBA-në në çdo mënyrë.
Çdo vend që strehon një bazë ushtarake amerikane duket se është në shënjestër – përfshirë Emiratet e Bashkuara Arabe, Katarin, Bahreinin dhe Kuvajtin, ndërsa mund të ketë dhe vende të tjera të prekura.
Tensionet në rajon kanë arritur nivele kritike, me evakuime që po zhvillohen pranë vendeve ushtarake iraniane, paralajmërime për sulme ajrore në disa vende të Gjirit dhe një përshkallëzim që tani përfshin drejtpërdrejt aktorë të shumtë rajonalë dhe ndërkombëtarë.
10:16 – Sirena bien në Tel Aviv, vala e dytë e raketave
Sirena ajrore po bien në Tel Aviv dhe në Izraelin qendror pas një lëshimi të dytë rakete nga Irani.
Njerëzit po nxiten të zhvendosen në strehimore nga bombat, shkruan CNN, transmeton Dukagjini.
Ndërkohë, Ministria e Shëndetësisë e Izraelit ka shpallur nivelin më të lartë të alarmit. Disa nga spitalet më të mëdha të vendit kanë njoftuar një kalim në operacione nëntokësore.
Për shembull, Qendra Mjekësore Sourasky e Tel Avivit ka hapur spitalin e saj nëntokësor të urgjencës dhe ka filluar transferimin e pacientëve dhe departamenteve në zona të fortifikuara.
“Njësitë e ndjeshme tashmë po operojnë në hapësira të mbrojtura”, tha spitali.
10:00 – Emiratet e Bashkuara Arabe mbyllin hapësirën ajrore pas shpërthimeve në Abu Dhabi
Emiratet e Bashkuara Arabe njoftuan gjithashtu se po mbyllin hapësirën e tyre ajrore, sipas agjencisë shtetërore të lajmeve WAM.
Shpërthime u dëgjuan në kryeqytetin Abu Dhabi dhe u pa tym duke u ngritur mbi qytet.
09:50 – Netanyahu kërkon ndryshim regjimi në deklaratën e parë për sulmet US-Izrael ndaj Iranit
Kryeministri izraelit, Benjamin Netanyahu, bëri të shtunën në mëngjes thirrje për ndryshim regjimi në Teheran në deklaratën e tij të parë video lidhur me sulmet e përbashkëta US-Izrael ndaj Iranit.
Netanyahu i bëri thirrje “të gjitha pjesëve të popullit iranian” që të “heqin zgjedhën e tiranisë dhe të sjellin një Iran të lirë dhe paqësor.”
“Veprimi ynë i përbashkët do të krijojë kushtet që populli i guximshëm iranian të marrë fatin e tij në duart e veta”, tha ai.
Gjatë luftës 12-ditore me Iranin në qershor, Netanyahu gjithashtu kishte bërë thirrje për popullin iranian që të ngrihej kundër regjimit.
Deklaratën e tij video ai e nisi duke falënderuar Donald Trump “për udhëheqjen e tij historike.”
“Ky regjimi vrasës terrorist nuk duhet të lejohet të fitojë armë bërthamore që do t’i mundësonin të kërcënonte gjithë njerëzimin,” tha Netanyahu.
09:15 – Presidenti i Iranit është i sigurt, thonë mediat shtetërore iraniane
Presidenti i Iranit, Masoud Pezeshkian, është gjallë, raportoi agjencia shtetërore iraniane Islamic Republic News Agency (IRNA), duke cituar një burim pranë presidencës.
Pezeshkian “është në gjendje të mirë shëndetësore,” tha IRNA në një postim të shkurtër në Telegram.
09:04 – Netanyahu e quan operacionin kundër Iranit “Ulërima e Luanit”
Kryeministri i Izraelit, Benjamin Netanyahu, e ka emërtuar “Ulërima e Luanit” operacionin ushtarak të nisur nga Izraeli kundër Iranit.
Sipas Haaretz, sulmet ndaj objektivave iraniane po vazhdojnë, ndërsa rritet rreziku i një kundërpërgjigjeje nga Teherani, shkruan CNN, transmeton Dukagjini.
Autoritetet iraniane kanë paralajmëruar përgatitje për reagim ushtarak dhe kanë vendosur në gatishmëri strukturat e emergjencës dhe mbrojtjes.
08:54 – Trump: Mund të ketë viktima nga operacioni ushtarak në Iran
Presidenti amerikan, Donald Trump, thotë se jetë amerikane mund të humben si rezultat i operacionit të tij ushtarak brenda Iranit.
“Regjimi iranian kërkon të vrasë. Jetët e heronjve të guximshëm amerikanë mund të humben dhe ne mund të kemi viktima — kjo ndodh shpesh në luftë — por ne po e bëjmë këtë jo për të tashmen. Po e bëjmë për të ardhmen, dhe është një mision fisnik,” tha presidenti.
Ai shtoi se SHBA ka “ndërmarrë çdo hap të mundshëm për të minimizuar rrezikun për personelin amerikan në rajon.”
08:39 – Trump konfirmon nisjen e fushatës ushtarake të SHBA-së në Iran
Presidenti amerikan, Donald Trump, ka konfirmuar se Shtetet e Bashkuara kanë nisur një fushatë ushtarake në Iran.
Trump nëpërmjet një videoje të publikuar në rrjetin social Truth, u shpreh se objektivi i vetëm i tyre është që të mbrojnë popullin amerikan duke eliminuar kërcënimet e afërta nga regjimi iranian, njofton Dukagjini.
“Objektivi ynë është të mbrojmë popullin amerikan duke eliminuar kërcënimet e afërta nga regjimi iranian, një grup i egër, njerëz shumë të ashpër dhe të tmerrshëm. Aktivitetet e tij kërcënuese rrezikojnë drejtpërdrejt Shtetet e Bashkuara, trupat tona, bazat tona jashtë vendit dhe aleatët tanë në mbarë botën,” deklaroi Trump në mesazhin katërminutësh.
Trump, mes tjerash, u shpreh se ky regjim nuk do të ketë kurrë qasje në armët bërthamore.
“Për 47 vjet, regjimi iranian ka brohoritur ‘Vdekje Amerikës’ dhe ka zhvilluar një fushatë të pandërprerë gjakderdhjeje dhe vrasjesh masive, duke shënjestruar Shtetet e Bashkuara, trupat tona dhe njerëzit e pafajshëm në shumë e shumë vende,” tha ai.
08:12 Izraeli ndalon aktivitetet jo të rëndësishme pas sulmit ndaj Iranit
Pas sulmit të ndërmarrë kundër Iranit, Komanda e Frontit të Brendshëm në Izrael ka urdhëruar qytetarët të kryejnë vetëm aktivitete thelbësore në të gjithë vendin.
Sipas mediave izraelite, masat e reja ndalojnë grumbullimet publike, vajtjen në punë dhe zhvillimin e mësimit në shkolla. Përjashtim bëhet vetëm për sektorët që autoritetet i konsiderojnë si “sektorë thelbësorë”.
07:40 – Izraeli sulmon Iranin në koordinim me SHBA-në
Izraeli dhe Shtetet e Bashkuara kanë nisur sulme të përbashkëta kundër Iranit, duke shënuar një përshkallëzim të madh të tensioneve në Lindjen e Mesme.
Ministri izraelit i Mbrojtjes, Israel Katz, deklaroi se Izraeli ka ndërmarrë një “sulm parandalues”, ndërsa në të gjithë vendin është shpallur gjendje e jashtëzakonshme për shkak të pritshmërisë së kundërpërgjigjes iraniane me dronë dhe raketa balistike.
Si masë sigurie, Izraeli ka mbyllur hapësirën ajrore, shkruan CNN, transmeton Dukagjini.
Tre zyrtarë amerikanë konfirmuan për CNN se edhe SHBA po kryen sulme ndaj Iranit, duke i cilësuar ato si “jo një sulm i vogël” dhe duke theksuar se operacioni është në zhvillim. Sipas raportimeve, goditje janë shënuar në disa qytete iraniane, përfshirë Teheranin, Isfahanin, Qomin, Karajin dhe Kermanshahun.
Agjencia shtetërore iraniane Fars News Agency raportoi për shpërthime dhe tym që ngrihet mbi kryeqytet.
Përpara nisjes së sulmeve, Donald Trump kishte dërguar sinjale të përziera lidhur me mundësinë e një ndërhyrjeje ushtarake.
Ai kishte deklaruar se SHBA kishte zhvendosur një “armadë” drejt rajonit “për çdo rast”, por njëkohësisht kishte thënë se preferonte dialogun me Teheranin. Në një fjalim në World Economic Forum në Davos, ai u shpreh se Irani dëshiron të negociojë dhe se SHBA është e gatshme për bisedime.
Trump e kishte justifikuar qëndrimin e ashpër me nevojën për të ndaluar regjimin iranian nga përdorimi i forcës vdekjeprurëse kundër protestuesve.
Sipas raportimeve nga organizata për të drejtat e njeriut, mijëra persona janë vrarë që nga nisja e protestave antiqeveritare, ndonëse shifrat ndryshojnë nga ato të publikuara nga autoritetet iraniane dhe nuk mund të verifikohen në mënyrë të pavarur.
Situata në rajon mbetet jashtëzakonisht e tensionuar, ndërsa frika për një përshkallëzim të mëtejshëm dhe një konflikt më të gjerë vazhdon të rritet.